ზედაპირულად ჩაატარეს ჩხრეკა - იცოდნენ, რომ ტელეფონი იყო მთავარი, რაც უნდა ამოეღოთ. გადაწყვიტეს, რომ ლეპტოპიც წაეღოთ, - ამის შესახებ სამოქალაქო აქტივისტმა, მარიამ ბაჯელიძემ განაცხადა.

მისივე თქმით, პროკურატურის წარმომადგენლების მთავარი მიზანი იყო ტელეფონის ამოღება.

„მათი მიზანი იყო ტელეფონი ამოეღოთ. პირდაპირ ეთერში რომ გავედი გაღიზიანდნენ და წამართვეს. მობილური როდესაც წაიღეს, ამიხსნეს, რომ მოსულები არიან საბოტაჟის მუხლით დაწყებულ გამოძიებაზე, ასევე უცხოეთიდან დაფინანსების შესახებ კანონი მიხსენეს. მეუბნებოდნენ, რომ ეძებდნენ რაიმე ტიპის ელექტრონულ ნივთს, ასევე კანონსაწინააღმდეგო ნივთიერებას, ან ნივთს. ჩხრეკის პროცესი ზედაპირულად ჩაატარეს. იცოდნენ, რომ ტელეფონი იყო მთავარი, რაც უნდა ამოეღოთ. გადაწყვიტეს, რომ ლეპტოპიც წაეღოთ“,- აღნიშნა ბაჯელიძემ.

ცნობისთვის, აქტივისტ მარიამ ბაჯელიძის სახლში ჩხრეკა დასრულდა. პროკურატურის წამომადგენლები მასთან, გამთენიისას მივიდნენ. პარალელურად, ჩხრეკა მიმდინარეობს „ნანუკას ფონდის" დამფუძნებლის, ნანუკა ჟორჟოლიანის სახლში. ასევე, საგამოძიებო უწყების წარმომადგენლები იმყოფებიან „ადამიანის უფლებათა ცენტრის“ ხელმძღვანელის ალეკო ცქიტიშვილის სახლშიც.