საქართველოს ზოგადსაგანმანათლებლო სკოლების გაძლიერების პროგრამის ფარგლებში, გრიგოლ რობაქიძის უნივერსიტეტის ხელოვნური ინტელექტის ლაბორატორიაში მოსწავლეებისთვის განხორციელდა ტრენინგი „ხელოვნური ინტელექტი განათლებაში“, რომელიც 10 დღის განმავლობაში მიმდინარეობდა.

ამის შესახებ ინფორმაციას გრიგოლ რობაქიძის უნივერსიტეტი ავრცელებს.

მათივე ცნობით, უნივერსიტეტის პარტნიორი: „აია ჯესის“, მე-10, 23-ე, 98-ე, 142-ე, 159-ე, 138-ე, 166-ე, 221-ე სკოლების 200-ამდე მოსწავლე დირექტორებთან/ პედაგოგებთან ერთად მონაწილეობდნენ ტრენინგში, რომელსაც ლაბორატორიის ხელმძღვანელი, პროფესორი - ხოსე რომერო უძღვებოდა.

„ტრენინგზე, რომელიც ინგლისურ ენაზე მიმდინარეობდა, განიხილეს: რა არის ხელოვნური ინტელექტი; ხელოვნური ინტელექტის შექმნის ისტორია; როგორ შეიძლება AI-ს სწორად გამოყენება; ხელოვნური ინტელექტის როლი განათლებაში; ხელოვნური ინტელექტის განვითარების ფაზები (AI მომავალში).

მოსწავლეებმა თავადაც შეასრულეს პროფესორის პრაქტიკული დავალებები.

ხელოვნური ინტელექტის ლაბორატორია გრუნი-ში 2025 წლის მარტში დაარსდა და მიზნად ისახავს ხელოვნური ინტელექტის სწავლებასა და სასწავლო და კვლევის პროცესში მის გამოყენებას“,- ნათქვამია ინფორმაციაში.