პოლონეთის რესპუბლიკაში მოქმედი სამხედრო-პოლიტიკური და უსაფრთხოების კვლევების სამეცნიერო ჟურნალ ANTE PORTAS-ის მთავარ რედაქტორად დაინიშნა კავკასიის საერთაშორისო უნივერსიტეტის საერთაშორისო ურთიერთობებისა და საერთაშორისო უსაფრთხოების სამაგისტრო პროგრამის / გლობალური პოლიტიკისა და უსაფრთხოების კვლევების ინგლისურენოვანი სამაგისტრო პროგრამის ხელმძღვანელი ვახტანგ მაისაია, მთავარი რედაქტორის მოადგილედ კი დაინიშნა კავკასიის საერთაშორისო უნივერსიტეტის საერთაშორისო ურთიერთობების საბაკალავრო პროგრამის ხელმძღვანელი, ასოცირებული პროფესორი ალიკა გუჩუა. ამის შესახებ ინფორმაციას კავკასიის საერთაშორისო უნივერსიტეტი ავრცელებს.

მათივე ცნობით, აღნიშნული ევროპული გამოცემა ერთ-ერთი ყველაზე პრესტიჟული სამეცნიერო-კვლევითი ინგლისურენოვანი გამოცემაა, რომელიც 2012 წლიდან მოქმედებს და გააჩნია მაღალი რეპუტაცია ნატოსა და ევროკავშირის სტრუქტურებში. მისი გამომცემელია იოზეფ გოლუხოვსკის სახელობის გამოყენებითი მეცნიერების უნივერსიტეტის ეროვნული უსაფრთხოების ფაკულტეტი.

ANTE PORTAS-ი აქვეყნებს სამეცნიერო-კვლევით სტატიებს, მიმოხილვებს, რეცენზიებსა და მოსაზრებებს, რომლებიც ეხება სოციალურ კვლევებს, განსაკუთრებით კი ყურადღება მახვილდება უსაფრთხოების პრობლემატიკის მიმართულებით სამხედრო, პოლიტიკურ, ეკონომიკურ, სოციალურ და ისტორიულ ასპექტებზე. ჟურნალი აერთიანებს სამხედრო ექსპერტებს, მკვლევარებსა და სპეციალისტებს, რომლებიც იკვლევენ უსაფრთხოების ისეთ მიმართულებებს, რომლებიც უკავშირდებიან შემდეგ ქვე-მიმართულებებს: შეიარაღებული კონფლიქტები; ჰიბრიდული ომები; გეოპოლიტიკა; საერთაშორისო ურთიერთობები; თავდაცვის პოლიტიკა და სამხედრო სტრატეგია; თავდაცვითი ეკონომიკა; ტერორიზმი და კონტრტერორიზმი; საინფორმაციო უსაფრთხოება; კრიზისების მართვა.

ჟურნალს გააჩნია ისეთი პრესტიჟული ევროპული და საერთაშორისო სამეცნიერო ინდექსები, როგორებიცაა: Index Copernicus და ERIHPlus.

აღსანიშნავია, რომ გამოცემასთან აქტიურად თანამშრომლობს კავკასიის საერთაშორისო უნივერსიტეტი, რომელიც არის მისი სტრატეგიული პარტნიორი”, - ნათქვამია ინფორმაციაში.