ავსტრალია ირანს ანტისემიტური თავდასხმების მოწყობაში ადანაშაულებს და ქვეყნიდან ირანის ელჩს აძევებს, - ამის შესახებ ინფორმაციას სააგენტო Reuters-ი ავსტრალიის პრემიერ-მინისტრზე, ენტონი ალბანეზეზე დაყრდნობით ავრცელებს.

ავსტრალიის პრემიერ-მინისტრის განცხადებით, ქვეყნის დაზვერვის სამსახურს სარწმუნო ინფორმაცია აქვს, რომ გასულ წელს, ქალაქ სიდნეისა და მელბურნში მდებარე ებრაულ რესტორანსა და სინაგოგაზე ირანის დაკვეთით, სულ მცირე, ორი ანტისემიტური თავდასხმა განხორციელდა.

„ეს ავსტრალიის ტერიტორიაზე უცხო ქვეყნის მიერ ორგანიზებული სახიფათო აგრესიის აქტები იყო. მათი მიზანი სოციალური ერთობისთვის ძირის გამოთხრა და საზოგადოებაში განხეთქილების დათესვა იყო“, - განაცხადა ენტონი ალბანეზემ.

ავსტრალიის საგარეო საქმეთა მინისტრის, პენი ვონგის ცნობით, ირანის ელჩმა აჰმად სადეღიმ და კიდევ სამმა ირანელმა ოფიციალურმა პირმა ავსტრალია შვიდი დღის განმავლობაში უნდა დატოვონ.

ცნობისთვის, ეს მეორე მსოფლიო ომის შემდეგ ავსტრალიის მიერ ელჩის გაძევების პირველ შემთხვევას წარმოადგენს.