ე.წ. კანონიერი ქურდის, მერაბ ჯანგველაძის ძმის, ლევან ჯანგველაძის მკვლელობისა და მისი მძღოლის, გია ჩადუნელის მკვლელობის მცდელობის ფაქტზე ბრალდებულ გელა უძილაურის ადვოკატის, გიორგი გამხიტაშვილის განცხადებით, 22-ტომიან მასალაში უძილაურის წინააღმდეგ მტკიცებულებები არ არის.

გამხიტაშვილი საქმის გარემოებებზე არ საუბრობს, თუმცა, ამბობს, რომ საქმეში მტკიცებულებები არ არსებობს.

"წარდგენილი ბრალდება არის აბსურდული, წარდგენილი ბრალდება მტკიცებულებებით არ დასტურდება. 22- ტომიან საქმეში არ არის არანაირი სახის მტკიცებულება, რითაც დადასტურდება ჩემი დაცვის ქვეშ მყოფი პირის მიერ შეკვეთილი მკვლელობის ჩადენის ფაქტი. ჩემი დაცვის ქვეშ მყოფი დუმილის უფლებით სარგებლობს, საქმის დეტალებთან დაკავშირებით ვერ გავაკეთებ", - განაცხადა გამხიტაშვილმა.

ცნობისთვის, ლევან ჯანგველაძის მკვლელობის ბრალდებით გელა უძილაურია დაკავებული.

შემთხვევა 2025 წლის 14 მარტს 23:30 საათზე თბილისში, ილია ჭავჭავაძის გამზირზე მოხდა. პროკურატურის ინფორმაციით, უძილაურმა ხალხმრავალ ადგილზე ცეცხლსასროლი იარაღიდან რამდენჯერმე ესროლა ლევან ჯანგველაძეს და მის მძღოლს გია ჩადუნელს. მიღებული მრავლობითი დაზიანების შედეგად ჯანგველაძე შემთხვევის ადგილზე გარდაიცვალა, ხოლო ჩადუნელი ცეცხლსასროლი იარაღიდან მიყენებული ჭრილობებით საავადმყოფოში გადაიყვანეს.

გელა უძილაურს ბრალდება საქართველოს სისხლის სამართლის კოდექსის 19.109-ე მუხლის „ბ“ და „ლ“ ქვეპუნქტებით (განზრახ მკვლელობის მცდელობა ჩადენილი ორის პირის მიმართ, ისეთი საშუალებით რომელიც საფრთხეს უქმნის სხვათა სიცოცხლეს და ჯანმრთელობას) და 236-ე მუხლის მესამე და მეოთხე ნაწილებით (ცეცხლსასროლი იარაღის მართლსაწინააღმდეგო შეძენა, შენახვა, ტარება) წარედგინა, რაც სასჯელის სახედ და ზომად 16 დან 20 წლამდე, ან უვადოდ თავისუფლების აღკვეთას ითვალისწინებს.