კახა კალაძის საარჩევნო ბანერის დაზიანების ფაქტზე დაკავებული მეგი დიასამიძის განცხადებით, მას კალაძის ბანერი არ დაუზიანებია, წარწერები არ გაუკეთებია და შესაბამისად არც ბრალს არ ეთანხმება.

ამის შესახებ მან სასამართლოს დარბაზიდან გათავისუფლების შემდეგ ჟურნალისტებთან განაცხადა.

მეგი დიასამიძის თქმით, გადაიხდის თუ არა სასამართლოს მიერ დაკისრებულ 2000-ლარიან გირაოს, ადვოკატებთან ერთად გადაწყვეტს.

„გირაოს გადავიხდი თუ არა, ამას ადვოკატებთან შევათანხმებ აუცილებლად, მათთან გავივლი კონსულტაციას და ყველაფერი ისე მოხდება. ველოდებოდი თუ არა [აღნიშნულ გადაწყვეტილებას], სიმართლე გითხრათ, ვერაფერს ვერ ვიგებდი მეორე მხარე რას აკეთებდა და ამას თვითონ ადვოკატებიც ვერ იგებდნენ. რომელი მუხლი იყო კონკრეტულად, არ მესმოდა და რადგან მუხლი არ მესმოდა, ვერ ვხდებოდი, საბოლოოდ რა გადაწყვეტილებას მიიღებდნენ. როდესაც უშუალოდ ადვოკატები ვნახე დარბაზში, იქ მითხრეს, რომ გირაოს ითხოვს პროკურატურა და როცა გირაო მოითხოვეს, გავთავისუფლდებოდი თუ არა, არ მქონდა ზუსტად ინფორმაცია და მოლოდინი არ მქონდა გათავისუფლების, სიმართლე რომ გითხრათ.

პროკურატურის ბრალდებას და გამომძიებლების ბრალდებას ვერანაირად ვერ დავეთანხმები. არ დამიზიანებია და ვერანაირად ვერ დავეთანხმები, ცხადია. მედავებოდნენ ისეთ ფაქტს, რაც არც კი ვიცოდი, არც კი გამიკეთებია, წარწერა არ გამიკეთებია“, - განაცხადა მეგი დიასამიძემ.

მან ჟურნალისტებთან დაკავების მომენტში სამართალდამცველების მხრიდან ცინიკურ დამოკიდებულებაზე ისაუბრა.

„განყოფილებამდე მთელი გზა მეკეთა ხელბორკილი და თურმე ყოფილა შესაძლებლობა, რომ ბორკილები საერთოდ არ მქონოდა მანქანაში. ბორკილების მოხსნაზე უარი მითხრეს. პოლიციელების მხრიდან არანაირ სექსუალურ და რელიგიურ შევიწროებას ადგილი არ ჰქონია, მაგრამ ცინიკურ დამოკიდებულებას ადგილი ჰქონდა საუბრის დროს აქციებთან დაკავშირებით“, - განაცხადა მეგი დიასამიძემ.

ცნობისთვის, თბილისის საქალაქო სასამართლომ აქტივისტ მეგი დიასამიძეს, რომელსაც თბილისის მერობის კანდიდატის, კახა კალაძის საარჩევნო ბანერის დაზიანებას ედავებიან, აღკვეთის ღონისძიების სახით 2 000 ლარიანი, არასაპატიმრო გირაო შეუფარდა. შესაბამისად, დიასამიძე დარბაზიდან გათავისუფლდა.