დანიის საგარეო საქმეთა მინისტრმა ლარს ლოკე რასმუსენმა თეთრ სახლში გამართული მოლაპარაკებების შემდეგ განაცხადა, რომ გრენლანდიასთან დაკავშირებით აშშ-სთან ფუნდამენტური უთანხმოება არსებობს, - ინფორმაციას BBC-ი ავრცელებს.

მინისტრმა აღნიშნა, რომ ვიცე-პრეზიდენტ ჯეი დი ვენსთან და სახელმწიფო მდივან მარკო რუბიოსთან შეხვედრა „გულწრფელი, მაგრამ კონსტრუქციული“ იყო, თუმცა, დასძინა, რომ აშშ-ის პრეზიდენტი დონალდ ტრამპი დაჟინებით მოითხოვს გრენლანდიის „დაპყრობას“, რაც „აბსოლუტურად მიუღებელია“.

BBC-ი წერს, რომ აშშ-ის, დანიისა და გრენლანდიის წარმომადგენლებს შორის ერთსაათიან შეხვედრას მნიშვნელოვანი გარღვევა არ მოჰყოლია, თუმცა ყველა მხარე შეთანხმდა, რომ შექმნან მაღალი დონის სამუშაო ჯგუფი დანიის ავტონომიური ტერიტორიის მომავლის განსახილველად.

რასმუსენმა განაცხადა, რომ არსებობს „წითელი ხაზები“, რომელთა გადაკვეთაც აშშ-ს არ შეუძლია და სამუშაო ჯგუფი მომდევნო კვირებში შეიკრიბება კომპრომისის მოსაძებნად. მისი თქმით, დანია და გრენლანდია ღია არიან აშშ-ს მიერ კუნძულზე მეტი სამხედრო ბაზების გახსნის შესაძლებლობის მიმართ.

რასმუსენმა ასევე განაცხადა, რომ ტრამპის მოსაზრებაში არის სიმართლის ელემენტი, რომ უსაფრთხოება უნდა გაძლიერდეს არქტიკაში რუსეთის და ჩინეთის ინტერესების წინააღმდეგ საბრძოლველად. თუმცა, დასძინა, რომ პრეზიდენტის კომენტარები გრენლანდიის გარშემო რუსული და ჩინური სამხედრო გემების არსებობის შესახებ სიმართლეს არ შეესაბამება.