ეს საქმე ბოდვაა, რომელშიც სრული სისულელეები წერია, - ამის შესახებ ე.წ. საბოტაჟის საქმეზე ბრალდებულმა ზურა გირჩი ჯაფარიძემ სასამართლო პროცესზე განაცხადა.

მისი თქმით, ყველაფერი იმისთვის გაკეთდა, რომ ოპოზიციონერი ლიდერები, ყველანი ერთად სასამართლო დარბაზში, "ბიძინა ივანიშვილს თავისი ამომრჩევლებისთვის ეჩვენებინა".

"მაგრამ რატომ აკეთებენ? დღეს, ყველა მეტ-ნაკლებად გამორჩეული ლიდერი ერთად დაესვათ სასამართლო პროცესზე, რომ შემდეგ ფოტო გავრცელებულიყო და გავრცელდა კიდეც, რათა ბიძინა ივანიშვილს ეს თავისი ამომრჩევლისთვის ეჩვენებინა.

მიმაჩნია, რომ ამ ყველაფრის მიზანი არის ის, რომ როდესაც უკრაინაში ომი მორჩება და რუსეთი ჩვენთვის მოიცლის, ქვეყანა თავდაცვისა და მეგობრების გარეშე დარჩეს",- განაცხადა ზურაბ ჯაფარიძემ.

ცნობისთვის, ე.წ. საბოტაჟის საქმეზე გენერალურმა პროკურატურამ მიხეილ სააკაშვილს, გიორგი ვაშაძეს, ნიკა გვარამიას, ნიკა მელიას, ზურაბ გირჩი ჯაფარიძეს, ელენე ხოშტარიას, მამუკა ხაზარაძესა და ბადრი ჯაფარიძეს ბრალდება წარუდგინა.

უფრო კონკრეტულად, გიორგი ვაშაძეს და ზურაბ გირჩი ჯაფარიძეს ბრალი სისხლის სამართლის კოდექსის 318-ე მუხლის პირველი ნაწილით და 319-ე მუხლით წარედგინათ, რაც საბოტაჟს და უცხო ქვეყნისათვის მტრულ საქმიანობაში დახმარებას გულისხმობს. აღნიშნული სასჯელის სახედ და ზომად 7-დან 15- წლამდე თავისუფლების აღკვეთას გულისხმობს.

ელენე ხოშტარიას ბრალდება საქართველოს სისხლის სამართლის კოდექსის 318-ე მუხლის პირველი ნაწილით, 319-ე მუხლით და 321-ე პრიმა მუხლის პირველი ნაწილით წარედგინა, რაც საბოტაჟის, აღნიშნული დანაშაულისთვის მატერიალური რესურსების მიწოდებას და უცხო ქვეყნისათვის მტრულ საქმიანობაში დახმარებას გულისხმობს.

ნიკა გვარამიას, ნიკა მელიას, მამუკა ხაზარაძეს და ბადრი ჯაფარიძეს ბრალდება საქართველოს სისხლის სამართლის კოდექსის 318-ე მუხლის პირველი ნაწილით წარედგინათ, რაც საბოტაჟს გულისხმობს.

მიხეილ სააკაშვილს ბრალდება სისხლის სამართლის კოდექსის 317-ე მუხლით აქვს წარდგენილი, რაც საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდებას გულისხმობს.

აღნიშნულ საქმეში გიორგი ვაშაძეს და ზურაბ გირჩი ჯაფარიძეს აღკვეთის ღონისძიების სახით 30 000-ლარიანი, მამუკა ხაზარაძესა და ბადრი ჯაფარიძეს კი 1 მილიონი ლარი გირაო აქვთ შეფარდებული.