პროკურატურამ შსს-ს გენერალური ინსპექციისა და არასრულწლოვნის მშობლის შეტყობინების საფუძველზე შსს-ს თანამშრომლების მხრიდან სამსახურებრივი უფლებამოსილების ძალადობით გადამეტების ფაქტზე გამოძიება დაიწყო.

ამის შესახებ ინფორმაციას პროკურატურა ავრცელებს.

“2026 წლის 12 თებერვალს, თბილისის პროკურატურის საგამოძიებო სამმართველოში დაიწყო გამოძიება, შინაგან საქმეთა სამინისტროს თანამშრომლების მხრიდან სამსახურებრივი უფლებამოსილების ძალადობით გადამეტების ფაქტზე, საქართველოს სისხლის სამართლის კოდექსის 333-ე მუხლის მესამე ნაწილით გათვალისწინებული დანაშაულის ნიშნებით.

გამოძიებას საფუძვლად დაედო საქართველოს შინაგან საქმეთა სამინისტროს გენერალური ინსპექციის მომართვა და საქართველოს პროკურატურის ცხელ ხაზზე შემოსული, არასრულწლოვნის მშობლის შეტყობინება.

საქმეზე ტარდება ყველა საჭირო საგამოძიებო და საპროცესო მოქმედება.

გამოძიების შედეგების შესახებ საზოგადოებას დამატებით მიეწოდება ინფორმაცია”, - წერია განცხადებაში.