უკრაინამ ნატო-ში გაწევრიანებისთვის ყველა საჭირო ნაბიჯი გადადგა. თუმცა, საბოლოო გადაწყვეტილება ალიანსის წევრმა ქვეყნებმა უნდა მიიღონ, - ამის შესახებ უკრაინის პრეზიდენტმა ვოლოდიმირ ზელენსკიმ ბრიტანელ ჟურნალისტ პირს მორგანთან ინტერვიუში განაცხადა.

„არ ვართ ნატო-ში. სამწუხაროა, მაგრამ არ ვართ. აშშ-ის წინა ადმინისტრაცია, ამჟამინდელი ადმინისტრაცია ვერ გვხედავს ნატო-ში, მოდით გულწრფელები ვიყოთ. ისინი ამბობენ ამას. მაგრამ ეს არ ნიშნავს, რომ მომავალში უკრაინა არ იქნება ნატო-ში. კიდევ გავიმეორებ, რომ ეს ჩვენზე არ არის დამოკიდებული. ჩვენ უკვე გავაკეთეთ, რაც უნდა გაგვეკეთებინა. ჩვენ ვთქვით, რომ გვსურს და მზად ვართ, ნატო-ს ნაწილი ვიყოთ, ძლიერი ნაწილი ვიყოთ და გავაძლიეროთ ყველა მოკავშირე. კიდევ რისი გაკეთება შეგვიძლია? არაფრის. ახლა ბურთი ჩვენი პარტნიორების - ნატო-ს ქვეყნების - მხარესაა. სწორედ ამიტომ ვუთხარი ნატო-ს ქვეყნებს, რომ მათზეა დამოკიდებული, ვეყოლებით თუ არა ჩვენ, მიგვიღებენ თუ არა მომავალში ნატო-ში“, - აღნიშნა ზელენსკიმ.

მისი თქმით, თუ ნატო-სა და რუსეთს შორის რაიმე ახალი დოკუმენტი განიხილება, უკრაინის პოტენციური წევრობის საკითხი უკრაინასთან უნდა განიხილონ.

„ვიცი, რომ ამერიკელები და, შესაძლოა, ზოგიერთი ევროპელიც რუსეთთან განიხილავს რუსეთსა და ნატო-ს შორის რაღაც ახალ დოკუმენტს. ჩემთვის მნიშვნელოვანია, ჩვენი პოტენციური ადგილი ნატო-ში არა რუსეთთან, არამედ ჩვენთან განიხილონ, რადგან ეს ჩვენ გვეხება“, - აღნიშნა ზელენსკიმ.