უკრაინის საპატრულო პოლიციის ხელმძღვანელმა ევგენი ჟუკოვმა კიევში 18 აპრილს მომხდარი ტერაქტის დროს პოლიციელების ქმედებების გამო თანამდებობა დატოვა.

„მე, როგორც სამხედრო ოფიცერმა გადავწყვიტე წარვადგინო განცხადება გადადგომის შესახებ. მე ვფიქრობ, ეს სამართლიანი იქნებოდა", - განაცხადა ჟუკოვმა პრესკონფერენციაზე.

მისი თქმით, ადგილზე გამოძახებული პოლიციელების ქმედება სამარცხვინო იყო.

„პოლიციელები მოიქცნენ არაპროფესიონალურად და ოფიცრის ღირსებასთან შეუფერებლად. ისინი მივიდნენ გამოძახებაზე, სადაც უნდა დახმარებოდნენ, უნდა გადაერჩინათ ჩვენი მოქალაქეები, თუმცა ისინი ცუდად ორიენტირდნენ და საფრთხეში დატოვეს დაჭრილები", - განაცხადა ჟუკოვმა.

მისივე თქმით, ჩატარდება შიდა გამოძიება და ამ ორი პოლიციელის ყველა ხელმძღვანელი პასუხისგებაში მიეცემა.

18 აპრილს, უკრაინის დედაქალაქ კიევში ერთმა პირმა ხალხს ცეცხლი გაუხსნა. მომხდარი ტერაქტად შეფასდა. როგორც კიევის მერმა ვიტალი კლიჩკომ განაცხადა, სროლის შედეგად 6 ადამიანი დაიღუპა, 8 ადამიანი კი დაიჭრა. თავდამსხმელი ლიკვიდირებულია.