NMG (ნიკორა მენეჯმენტ ჯგუფი), რომელიც უკვე წლებია აქტიურად ზრუნავს ახალგაზრდების ხელშეწყობასა და დახმარებაზე, კორპორაციული სოციალური პასუხისმგებლობის ფარგლებში, რეგიონული სკოლების დახმარების პროექტს აგრძელებს. ჰოლდინგი ამჯერად გურიისა და სვანეთის სკოლებს ესტუმრება და დაასაჩუქრებს.

ხვალიდან, 21 აპრილიდან რამდენიმე დღის განმავლობაში NMG-ის წარმომადგენლები გურიის, შემდეგ კი სვანეთის რეგიონს ეწვევიან. წინასწარ შერჩეული 4 სკოლა მიიღებს სპეციალურ საჩუქრებს - თანამედროვე კომპიუტერულ ტექნიკასა და მხატვრულ ლიტერატურას სასკოლო ბიბლიოთეკის მოსაწყობად. მოსწავლეებს კი ინდივიდუალურად გადაეცემათ სასკოლო ნივთები.

პროექტის შემდეგი ეტაპი უკვე დაგეგმილია. კიდევ 4 სკოლის დახმარება მიმდინარე წლის შემოდგომაზე იგეგმება.

აღსანიშნავია, რომ ინიციატივა წლების წინ გაჩნდა და ამ დროის განმავლობაში NMG-მ უკვე ათეულობით სკოლას გაუწია დახმარება მთელი საქართველოს მასშტაბით. მათ შორისაა სკოლები ქართლში, კახეთში, იმერეთში, რაჭა-ლეჩხუმში, ქვემო სვანეთში, აჭარასა და სამცხე-ჯავახეთში. საერთო ჯამში, პროექტის ფარგლებში დახმარება 30-ზე მეტმა საჯარო სკოლამ მიიღო.

როგორც კომპანიაში განმარტავენ, მათი მიზანია, რომ რეგიონებში მცხოვრებ ბავშვებს ჰქონდეთ ისეთივე წვდომა თანამედროვე ტექნოლოგიებსა და ლიტერატურაზე, როგორიც დედაქალაქის მოსწავლეებს.