პარლამენტის საპროცედურო საკითხთა კომიტეტმა რამდენიმე ოპოზიციური პარტიის არაკონსტიტუციურად ცნობასთან დაკავშირებულ ახალ საკონსტიტუციო სარჩელზე ხელმომწერი დეპუტატების ხელმოწერის ნამდვილობა დაადასტურა. საკონსტიტუციო სარჩელს პარლამენტის 89 წევრი აწერს ხელს.

რეგლამენტის მიხედვით, პარლამენტის წევრთა არანაკლებ ერთი მეხუთედი უფლებამოსილია სარჩელით საკონსტიტუციო სასამართლოს მიმართოს. მიმართვამდე კი, კონსტიტუციურ სარჩელზე პარლამენტის წევრთა ხელმოწერის ნამდვილობა მოწმდება.

კომიტეტმა დღეს გამართულ სხდომაზე პარლამენტის 89 წევრის ხელმოწერების ნამდვილობა დაადგინა და დაასკვნა, რომ აღნიშნული კონსტიტუციური სარჩელის წარდგენის უფლებას იძლევა.

პარტია “ქართული ოცნება“ საკონსტიტუციო სასამართლოს პარტიების აკრძალვასთან დაკავშირებით ახალი კონსტიტუციური სარჩელით მიმართავს, ძველ სარჩელს კი უკან გამოითხოვს. “ქართულმა ოცნებამ“ ახალი სარჩელით ასაკრძალი პარტიების ჩამონათვალს პარტია “ფედერალისტები“ დაამატა.

“ქართულმა ოცნებამ“ საკონსტიტუციო სასამართლოს გასული წლის 31 ოქტომბერს სამი ოპოზიციური პარტიის: - “ნაციონალური მოძრაობის“, კოალიცია ცვლილებისთვის“ და “ლელო - ძლიერი საქართველოს“ აკრძალვის მოთხოვნით მიმართა.