საქართველოს პარლამენტმა ახალი საპარლამენტო ჯილდო - საქართველოს პარლამენტის საპატიო მედალი დააწესა. ინფორმაციას პარლამენტის პრესსამსახური ავრცელებს.

მათივე ცნობით, პარლამენტის საპატიო მედალი - აზერბაიჯანის რესპუბლიკის მილი მეჯლისის თავმჯდომარეს, საჰიბა გაფაროვას საქართველოსა და აზერბაიჯანის რესპუბლიკას შორის თანამშრომლობის გაღრმავებასა და საპარლამენტაშორისო ურთიერთობების განვითარებაში შეტანილი განსაკუთრებული წვლილისთვის გადაეცა.

"საჰიბა გაფაროვა პირველია, ვინც პარლამენტის ახალი რეგლამენტის თანახმად დაწესებული პარლამენტის საპატიო მედლით დაჯილდოვდა.

პარლამენტის ახალი რეგლამენტის თანახმად, პარლამენტის საპატიო მედლით ჯილდოვდება საქართველოს ან სხვა სახელმწიფოს მოქალაქე საპარლამენტათაშორისო ურთიერთობების განვითარებაში შეტანილი განსაკუთრებული წვლილისთვის," - აღნიშნულია ინფორმაციაში.