აშშ-ის პრეზიდენტის სპეცწარმომადგენელი სტივ უიტკოფი და ტრამპის სიძე ჯარედ კუშნერი ირანელებთან მოლაპარაკებებისთვის პაკისტანში გაემგზავრებიან. ამის შესახებ ინფორმაციას CNN-ი ტრამპის ადმინისტრაციის ორ მაღალჩინოსანზე დაყრდნობით ავრცელებს.

წყაროების ინფორმაციით, 25-26 აპრილს, აშშ-ის პრეზიდენტი, დონალდ ტრამპი თავის სპეცწარმომადგენელს, სტივ უიტკოფსა და თავის სიძეს, ჯარედ კუშნერს პაკისტანის დედაქალაქ ისლამაბადში გაგზავნის, სადაც მათ მოლაპარაკებები ექნებათ ირანის საგარეო საქმეთა მინისტრთან, აბას არაღჩისთან.

წყაროების ცნობით, აშშ-ის ვიცე-პრეზიდენტის, ჯეი დი ვენსის მონაწილეობა არ იგეგმება, ვინაიდან შეხვედრას არ დაესწრება ირანის პარლამენტის თავმჯდომარე, მოჰამედ-ბაღერ ღალიბაფი. თუმცა, წყაროები ასევე აღნიშნავენ, რომ ვენსის გარემოცვის წევრები პაკისტანში იქნებიან და მოლაპარაკებებს დაესწრებიან, და თავად ვიცე-პრეზიდენტი მზად იქნება ისლამაბადში გაემგზავროს თუ მოლაპარაკებებში პროგრესი იქნება მიღწეული.