ვაშინგტონში, „თეთრი სახლის კორესპონდენტთა ასოციაციის“ სადილზე სროლაში ეჭვმიტანილს დონალდ ტრამპის მკვლელობის მცდელობისთვის ბრალი წაუყენეს
ვაშინგტონში „თეთრი სახლის კორესპონდენტთა ასოციაციის“ სადილის დროს სროლაში ეჭვმიტანილს დონალდ ტრამპის მკვლელობის მცდელობისთვის ბრალი წაუყენეს, - ინფორმაციას Reuters-ი ავრცელებს.
ვაშინგტონში, შაბათს საღამოს, „თეთრი სახლის კორესპონდენტთა ასოციაციის“ სადილის დროს თავდასხმაში ეჭვმიტანილ 31 წლის კოულ თომას ალენს აშშ-ის პრეზიდენტის, დონალდ ტრამპის მკვლელობის მცდელობისთვის ბრალი ფედერალური მუხლით წაუყენეს.
ვაშინგტონის ფედერალური სასამართლოს მოსამართლის განცხადებით, ბრალის დამტკიცების შემთხვევაში ეჭვმიტანილს სამუდამო პატიმრობა ემუქრება.
„მან ამერიკის შეერთებული შტატების პრეზიდენტის, დონალდ ჯ. ტრამპის მკვლელობა სცადა“, - განაცხადა პროკურორმა ჯოსელინ ბალანტინმა პროცესზე.
ასევე, კოულ თომას ალენს კიდევ ორი ბრალდება წაუყენეს, კერძოდ, ცეცხლსასროლი იარაღის გამოყენება დანაშაულის ჩადენის დროს და დანაშაულის ჩადენის განზრახვით შტატებს შორის ცეცხლსასროლი იარაღის გადატანა.
