რუსეთთან ეკონომიკური კავშირების გაწყვეტის შემთხვევაში, სომხეთს ეკონომიკური სირთულეები შეექმნება. რუსეთის ბაზარზე სომხური პროდუქციის ნაწილს აზერბაიჯანული პროდუქცია ჩაანაცვლებს, - ამის შესახებ რუსეთის პრეზიდენტის სპეციალურმა წარმომადგენელმა ბორის ტიტოვმა განაცხადა.

მისი თქმით, შედეგები, პირველ რიგში, სომხეთის ეკონომიკაზე იმოქმედებს და შესაძლოა, როგორც ენერგეტიკის, ასევე სურსათის ბაზრებზეც აისახოს. ტიტოვის თქმით, სომხეთისთვის ენერგორესურსების ფასები შესაძლოა ევროპულ დონეს მიუახლოვდეს, ხოლო შიდა ბაზარზე სურსათის ფასები შესაძლოა გაიზარდოს.

„ჩვენ კი იმას, რასაც სომხეთში ვკარგავთ, რა თქმა უნდა, აზერბაიჯანით ჩავანაცვლებთ“, - განაცხადა ტიტოვმა.

შეგახსენებთ, რუსეთმა სომხეთიდან გარკვეული ხილისა და ბოსტნეულის იმპორტი შეზღუდა. შეზღუდვები დაწესდა სომხურ ყვავილებზე, მინერალურ წყალ „ჯერმუკზე“, ღვინოსა და კონიაკზე.

მაისის ბოლოს, „როსელხოზნადზორმა“ (რუსეთის ვეტერინარული და ფიტოსანიტარიული ზედამხედველობის ფედერალურმა სამსახურმა) განაცხადა, რომ სომხური სასოფლო-სამეურნეო პროდუქტები ბოლო დროს ვერ აკმაყოფილებდა რუსეთისა და ევრაზიის ეკონომიკური კავშირის მოთხოვნებს.