უკრაინისა და მოლდოვისთვის ევროკავშირში გაწევრიანების მოლაპარაკებების პირველი კლასტერი 15 ივნისს გაიხსნება, - ინფორმაციას უკრაინული გამოცემა „ევროპეისკაია პრავდა“ წყაროებზე დაყრდნობით ავრცელებს.

გამოცემის ცნობით, უკრაინისა და მოლდოვისთვის პირველი კლასტერის, „საფუძვლების“ გახსნის საკითხზე სამთავრობათშორისო კონფერენციები ლუქსემბურგში 15 ივნისს გაიმართება.

„15 ივნისს ლუქსემბურგში, ორი ცალკეული სამთავრობათშორისო კონფერენცია გაიმართება, ერთი უკრაინისთვის და მეორე მოლდოვისთვის“, - განუცხადა ევროპელმა წყარომ გამოცემას.

წყაროს თქმით, პირველი კლასტერის გახსნისთვის სამუშაო ჯგუფებისა და ელჩების დონეზე აქტიური მუშაობა მიმდინარეობს.

ცნობისთვის, ევროკავშირის საბჭოს კვიპროსის თავმჯდომარეობამ განაცხადა, რომ უკრაინისა და მოლდოვის ევროკავშირში გაწევრიანების მოლაპარაკებების პირველი კლასტერის ოფიციალურად გახსნისთვის მოსამზადებელი სამუშაოები დაიწყო.