საქართველოს საგარეო საქმეთა სამინისტრო ისევ დაიმალება, თუ რამეს გვეტყვის საქართველოს მოქალაქეებს?! , - ამის შესახებ „გახარია საქართველოსთვის” ერთ-ერთი ლიდერი, ანა ბუჩუკური სოციალურ ქსელში წერს, რითაც რუსეთის ფედერაციის საგარეო საქმეთა სამინისტროს განცხადებას ეხმაურება იმის შესახებ, რომ 5 ივნისს 3+3 ფორმატის პირველი ექსპერტული შეხვედრა გაიმართება.

„რუსეთის ფედერაციის საგარეო საქმეთა სამინისტრო წერს, რომ ხვალ, 5 ივნისს 3+3 ფორმატის პირველი ექსპერტული შეხვედრა გაიმართება. საქართველოს საგარეო საქმეთა სამინისტრო ისევ დაიმალება, თუ რამეს გვეტყვის საქართველოს მოქალაქეებს?!“, - წერს ანა ბუჩუკური.

5 ივნისს სანქტ-პეტერბურგში 3+3 ფორმატის (საქართველო, სომხეთი, აზერბაიჯანი, რუსეთი, თურქეთი და ირანი) პირველი საექსპერტო შეხვედრა გაიმართება.

რუსეთის საგარეო საქმეთა სამინისტროს პრესსპიკერმა მარია ზახაროვამ განაცხადა, რომ მასში მონაწილეობას მიიღებს რუსული მხრიდან საგარეო საქმეთა მინისტრის მოადგილე, მიხაილ გალუზინი.

“5 ივნისს, რუსეთის საგარეო საქმეთა მინისტრის მოადგილე, მიხაილ გალუზინი მონაწილეობას მიიღებს 3+3 რეგიონალური თანამშრომლობის პლატფორმის - აზერბაიჯანი, სომხეთი და საქართველო, პლუს რუსეთი, ირანი და თურქეთი - პირველ საექსპერტო შეხვედრაში სანქტ-პეტერბურგის საერთაშორისო ეკონომიკურ ფორუმზე”, - განაცხადა ზახაროვამ.