შეერთებულმა შტატებმა კუბის პრეზიდენტისა და მისი ოჯახის ზოგიერთი წევრის, ასევე კასტროების ოჯახის წევრების წინააღმდეგ ახალი ეკონომიკური სანქციები გამოაცხადა.

დასანქცირებულ პირებს შორის არიან ყოფილი პრეზიდენტის, რაულ კასტროს ვაჟი და შვილიშვილი. რაულ კასტრო ოფიციალურ თანამდებობას აღარ იკავებს, მაგრამ კუნძულის მომავალთან დაკავშირებული გადაწყვეტილებების მიღებისას მნიშვნელოვან ფიგურად რჩება.

აშშ-ის ფინანსთა სამინისტროს მიერ გამოცხადებული უახლესი სანქციების სიაში ასევე მოხვდნენ პრეზიდენტი მიგელ დიას-კანელი, მისი მეუღლე და გერი, ისევე როგორც რევოლუციური შეიარაღებული ძალების სამინისტრო და რამდენიმე სხვა ორგანიზაცია.

აშშ-ს კუბაზე ათწლეულების განმავლობაში ემბარგო აქვს დაწესებული. აშშ-ის პრეზიდენტმა დონალდ ტრამპმა ბოლო თვეებში კუნძულზე ზეწოლა გააძლიერა. საწვავის ბლოკადამ კუნძულის ენერგეტიკული კრიზისი გაამწვავა და მის ისედაც მყიფე ეკონომიკას დიდი დარტყმა მიაყენა.