ეს ყველაფერი, კიდევ ერთხელ, აჩვენებს, რომ მათ შორის [ოპოზიციის ცალკეულ პარტიებს შორის] არანაირი რეალური ერთობა არ არის, - ამის შესახებ „ქართული ოცნების“ ერთ-ერთმა დეპუტატმა, ირაკლი ქადაგიშვილმა ჟურნალისტებს განუცხადა.

ქადაგიშვილის თქმით, ოპოზიციაში არსებული დაპირისპირება მიუთითებს იმას, რომ მათ ქართულ პოლიტიკაში პერსპექტივა არ გააჩნიათ.

„მიუხედავად იმისა, რომ ყველა, გარკვეულწილად ერთი და იგივე იდეოლოგიის და მიზნების მატარებელია, შინაარსობრივად, მათ შორის ისეთი გადაულახავი პიროვნული წინააღმდეგობრივი [მოცემულობაა], რომ ეს ნათლად მიუთითებს, მათ რაიმე პერსპექტივა ქართულ პოლიტიკაში რეალურად არ გააჩნიათ. ეს კიდევ ერთხელ გვაჩვენებს იმას, თუ რაოდენ ყალბი იყო ის პროპაგანდა, რომელიც გაშლილი იყო, მათ შორის არჩევნების წინ, რომ გინდა თუ არა, მხოლოდ და მხოლოდ კოალიციური მმართველობა არის გამოსავალი ქვეყნისთვის. ამან კიდევ ერთხელ დაგვანახა, რას ნიშნავს კოალიცია კოალიციისთვის, რომ ეს ახლა, „ნაციონალური მოძრაობის“ შიგნით მიმდინარე დაპირისპირების ნათელი სურათია. ეს ხალხი რომ ხელისუფლებაში ყოფილიყო, რას დამართებდა სახელმწიფოს, ქვეყანას და საზოგადოებას უკვე ნათელი არის“, - განაცხადა ქადაგიშვილმა.

გარდა ამისა, მან ისაუბრა მიმდინარე წლის 11 ივნისს, ევროკომისიის მიერ ვიზების საკითხთან დაკავშირებით საქართველოსთან დაგეგმილ დიალოგზე.

ქადაგიშვილის მოსაზრებით, ევროკავშირი საქართველოსთან მიმართებით მთელ რიგ საკითხებს იყენებს ზეწოლისა და შანტაჟისთვის. ქადაგიშვილის თქმით, არის საკითხები, რასთან მიმართებითაც საქართველოს ვერ ექნება ის პოზიცია, რაც „შეიძლება ევროკავშირის გარკვეულ ძალებს უნდოდეთ, ანუ მთლიანად შეერთება ევროკავშირის საგარეო პოლიტიკურ ვექტორთან“. ეს კი, ქადაგიშვილის თქმით, ავტომატურად ნიშნავს იმას, რომ საქართველომ რუსეთს უნდა დაუწესოს სანქციები.

„გვეუბნებიან, გააუქმეთ უვიზო რეჟიმები რუსეთთან, ჩინეთთან მთელ რიგ ქვეყნებთან. ისეთ შეზღუდვებს გიწესებენ, რომ ეს ევროკავშირის პირდაპირ ინტერესში არანაირად არ შედის და საქართველოს ინტერესში ხომ საერთოდ არ შედის, მაგრამ რატომ კეთდება ეს? კეთდება სწორედ ზეწოლისთვის“, - განაცხადა ქადაგიშვილმა.

რაც შეეხება ოპოზიციის მოსაზრებებს და არგუმენტებს ამ საკითხთან დაკავშირებით, „ქართული ოცნების“ დეპუტატის თქმით, მარტივია ამ ოპოზიციის ფილოსოფია: ის, რაც ცუდია საქართველოსთვის, მათი აზრით, ეს არის ხელისუფლებაში მათი მობრუნების ერთადერთი შანსი. „ეს არის მთელი ოპოზიციის „ალია-ბალია“.

„სხვათაშორის, ის საბაბები, რაც ევროკავშირის გარკვეულ წრეებს აქვთ საქართველოსთან მიმართებით, სწორედ ამ ოპოზიციის შექმნილია, მაგალითად, როდესაც მათ უარი განაცხადეს არჩევნების შედეგების აღიარებაზე, პარლამენტში შესვლაზე და ეს ე.წ. დემოკრატიული უკუსვლის მთელი კამპანია გააჩაღეს, ყოვლად უსაფუძვლო, უარგუმენტო, დამაზიანებელი, ახლა თავად ოპოზიციას ჭამს, მაგრამ ეს არის საქართველოს წინააღმდეგ მიცემული საბაბი, მათ შორის იგივე ამ განხილვების დროს. ასე რომ, ოპოზიციას ლომის წვლილი აქვს იმ ევროჩინოვნიკებთან ერთად, ამ შანტაჟის პოლიტიკაში. შანტაჟის ნაწილთან დაკავშირებით ის არის, რომ პირობები ევროლიბერალიზაციის დასაწყისში არ იყო და მერე გზადა გზა, გამომდინარე იქიდან, პოლიტიკურად როგორ უნდოდათ სიტუაციის მართვა, გიმატებდნენ გარკვეულ საკითხებს. როცა ჩვენ ვიზალიბერალიზაცია მივიღეთ, რუსეთთან უვიზო მიმოსვლა გვქონდა, მაგრამ ეს მაშინ პრობლემა არ იყო. “- განაცხადა ქადაგიშვილმა