პარლამენტთან საპროტესტო აქცია განახლდა
რუსთაველის გამზირზე საპროტესტო აქცია განახლდა.
პარლამენტთან შეკრებილ აქციის მონაწილეებს ლოზუნგით - "ერთად ძალადობის და ჩაგვრის წინააღმდეგ“ ფილარმონიიდან გამართული მსვლელობის მონაწილეები შეუერთდნენ.
მოქალაქეები პარლამენტთან უცვლელი მოთხოვნებით შეიკრიბნენ - დაინიშნოს ახალი საპარლამენტო არჩევნები და გათავისუფლდნენ აქციების ფარგლებში დაკავებული პირები.
დემონსტრანტებს ადგილზე მიტანილი აქვთ დროშები და სხვადასხვა შინაარსის ბანერები.
გარდა ამისა, ადგილზე არიან ირანის მოქალაქეები, რომლებიც, ირანის მთავრობის ქმედებებს აპროტესტებენ. მათ ირანის დროშა გაშალეს.
ცნობისთვის, უკვე ერთ წელზე მეტია, პარლამენტთან მოქალაქეების უწყვეტი პროტესტი მიმდინარეობს. ისინი ქვეყანაში არსებულ პოლიტიკურ ვითარებასა და ევროკავშირთან გაწევრიანებაზე მოლაპარაკებების შეჩერებას აპროტესტებენ.
