დარწმუნებული ვარ, რომ ხალხი გაიმარჯვებს, მოლოდინი მაქვს, რომ სომხეთის მოქალაქეები გაიმარჯვებენ, - ამის შესახებ სომხეთის პრემიერ-მინისტრმა ნიკოლ ფაშინიანმა ჟურნალისტებს განუცხადა.

რეგიონზე არჩევნების შესაძლო შედეგების შესახებ დასმულ კითხვაზე საპასუხოდ ფაშინიანმა განაცხადა, რომ დემოკრატია ყოველთვის რეგიონული და საერთაშორისო თანამშრომლობის სასარგებლოდ მოქმედებს.

„ვფიქრობ, დემოკრატია ყოველთვის რეგიონული და საერთაშორისო თანამშრომლობის სასარგებლოდ მუშაობს და რა თქმა უნდა, დემოკრატია რეგიონული მშვიდობის მნიშვნელოვანი ინსტრუმენტია. ამჟამად, საბედნიეროდ, აზერბაიჯანთან მშვიდობა გვაქვს. თქვენ იცით, რომ საქართველოსთან ძალიან ღრმა და ძმური ურთიერთობები გვაქვს. და, რა თქმა უნდა, მე თურქეთთან დიპლომატიური ურთიერთობების დალაგებას და დამყარებას ველი“, - აღნიშნა სომხეთის პრემიერმა.

მისი თქმით, დარწმუნებულია, რომ თურქეთთან საზღვარი, ასევე სარკინიგზო და საავტომობილო კომუნიკაციები უახლოეს მომავალში გაიხსნება.

სომხეთის პრემიერ-მინისტრმა ასევე ხაზი გაუსვა „ტრამპის გზის“ პროექტის მნიშვნელობას.

„TRIP“-ის პროექტი „გეიმ ჩეინჯერია“, რომელიც სარგებელს მოუტანს ჩვენი რეგიონის ყველა ქვეყანას, რადგან ჩვენ გვექნება გახსნილი არა მხოლოდ აღმოსავლეთ-დასავლეთის, არამედ სამხრეთ-ჩრდილოეთის მარშრუტებიც, რაც ძალიან სასარგებლოა სომხეთისთვის, საქართველოსთვის, აზერბაიჯანისთვის, თურქეთისა და ირანისთვის. ეს ძალიან მნიშვნელოვანია“,-აღნიშნა ფაშინიანმა.