ჩრდილოეთ კორეის ლიდერის, კიმ ჩენ ინის განცხადებით, ჩინეთთან მეგობრობის შენარჩუნება ჩრდილოეთ კორეის მთავარ პრიორიტეტად რჩება, - ინფორმაციას BBC-ი სახელმწიფო საინფორმაციო სააგენტო KCNA-ზე დაყრდნობით ავრცელებს.

კიმ ჩენ ინის თქმით, ჩინეთის პრეზიდენტ სი ძინპინის ჩრდილოეთ კორეაში ვიზიტი ამ მეგობრობის სიმტკიცის შეხსენებაა.

ჩრდილოეთ კორეის ლიდერის თქმით, ის მხარს უჭერს პეკინის „ერთი ჩინეთის“ პრინციპს, ასევე ჩინეთის კომუნისტური პარტიის პოლიტიკას.

თავის მხრივ, სი ძინპინმა შეაქო ჩინეთსა და ჩრდილოეთ კორეას შორის ურთიერთობები და განაცხადა, რომ ეს ურთიერთობები „ახალ ისტორიულ საწყის წერტილზეა“.

ცნობისთვის, ჩინეთის პრეზიდენტი სი ძინპინი ორდღიანი ვიზიტით ჩრდილოეთ კორეაში იმყოფება. ვიზიტის ფარგლებში ჩინეთის და ჩრდილოეთ კორეის ლიდერების შეხვედრა გაიმართა, რომელზეც მხარეებმა თანამშრომლობის გაფართოების პირობა დადეს.