მე თუთიყუშზე ვნერვიულობ, თუთიყუში როგორ არის? ეგ ინფორმაცია მაინტერესებს, რა მდგომარეობაშია თუთიყუში მას შემდეგ, რაც ბუმბული დაკარგა, არ გვაქვს ინფორმაცია? - ასე უპასუხა დედაქალაქის მერმა, კახა კალაძემ ჟურნალისტის მიერ დასმულ შეკითხვას აქციების დროს დაშავებული მოქალაქეების შესახებ.

კერძოდ, ჟურნალისტმა კალაძეს უთხრა, რომ ის მოქალაქეები, რომლებიც აქციების დაშლის დროს დაშავდნენ, პროკურატურას დაზარალებულად არ უცნია. მედიის წარმომადგენელმა თბილისის მერს ასევე გაახსენა BBC-ს დოკუმენტური ფილმი, რომელშიც ნოემბერ-დეკემბერში, აქციების დაშლის დროს ქიმიური ნივთიერების შესაძლო გამოყენებაზე იყო საუბარი. სწორედ ამ დროს „დაინტერესდა“ კახა კალაძე თუთიყუშის მდგომარეობით.

ცნობისთვის, მას შემდეგ, რაც BBC-ის დოკუმენტური ფილმის საშუალებით აქციების დაშლის დროს ქიმიური ნივთიერების შესაძლო გამოყენების შესახებ გახდა ცნობილი, აქციების ერთ-ერთმა მონაწილემ, რომელიც პარლამენტის მახლობლად ცხოვრობდა, სატელევიზიო ეთერში განაცხადა, რომ „მომწამვლელი ნივთიერების გამო მის თუთიყუშს ბუმბული გასცვივდა“:„შეიძლება სასაცილოა, რასაც ვიტყვი - თუთიყუშს დასცვივდა ბუმბული, გინდ დაიჯერეთ, გინდ არა. იმ პერიოდში მე, ძაღლი და თუთიყუში ვცხოვრობდით, ოჯახი გახიზნული მყავდა და თუთიყუშს დასცვივდა ბუმბული“, - განაცხადა მოქალაქემ.