ესტონეთის პრეზიდენტის ალარ კარისის განცხადებით, უკრაინის ევროკავშირში გაწევრიანების შესახებ მოლაპარაკებების ფარგლებში ყველა კლასტერი სწრაფად უნდა გაიხსნას.

უკრაინული მედიის ცნობით, ესტონეთის პრეზიდენტმა ეს განცხადება ტალინში, უკრაინის პრეზიდენტ ვოლოდიმირ ზელენსკისთან ერთობლივ პრესკონფერენციაზე გააკეთა.

კარისის თქმით, უკრაინის ადგილი ევროკავშირსა და ნატო-ში და უკრაინისთვის ევროკავშირში გაწევრიანების შესახებ მიცემული დაპირება „მხოლოდ ქაღალდზე არ უნდა დარჩეს“.

„ესტონეთი მხარს უჭერს უკრაინასა და ევროკავშირს შორის გაწევრიანების მოლაპარაკებებში ყველა კლასტერის სწრაფ გახსნას. ეს უნდა მოხდეს ამ ზაფხულს, ახლავე, ივნისში, რადგან ამჟამად ამისთვის არანაირი დაბრკოლება არ არსებობს“, - განაცხადა ესტონეთის პრეზიდენტმა.

ალარ კარისმა ხაზგასმით აღნიშნა, რომ უკრაინელი ხალხისთვის ევროკავშირსა და ნატო-ში გაწევრიანება არა შორეული იმედი, არამედ ლეგიტიმური მოლოდინია.

„ევროპისა და ევროატლანტიკური სივრცისთვის უკრაინის გაწევრიანება გაძლიერების შესაძლებლობაა“, - განაცხადა ესტონეთის პრეზიდენტმა.

შეგახსენებთ, უკრაინის პრეზიდენტი ვოლოდიმირ ზელენსკი ესტონეთს დღეს ეწვია.