პარლამენტიდან მთავრობის ადმინისტრაციამდე მსვლელობა მიმდინარეობს.

აქცია 18 ივლისს, თელავში, სასტუმროში მომხდარი ინციდენტთან დაკავშირებით დაიგეგმა.

მარში მონაწილეები სკანდირებენ: „ეს საქართველოა და საქართველოში ქართველებს არავის დავაჩაგვრინებთ!“, „ძირს რუსეთის დამპალი იმპერია!“, „თავისუფლება რეჟიმის ტყვეებს!“.

„საქართველოში რუსების ადგილი არ არის! წაბრძანდნენ იმ ქვეყანაში, სადაც ასეთი უღირსი და ამორალური ქმედებები მართლდება. საქართველოში, ქართველები არასდროს შევეგუებით რუსეთის ოკუპაციას!“,- აცხადებენ მარშის მონაწილეები.

ცნობისთვის, თელავში მომხდარი ინციდენტის გამო სამართალდამცავებმა გიორგი ჭიღლაძე დააკავეს. გამოძიება მის წინააღმდეგ სისხლის სამართლის კოდექსის 120-ე მუხლით დაიწყო, რაც ჯანმრთელობის განზრახ მსუბუქი დაზიანებას გულისხმობს. აღნიშნული ქმედება 3-წლამდე ვადით თავისუფლების აღკვეთას ითვალისწინებს.

გამოძიების თანახმად, თელავში, ერთ-ერთ სასტუმროში, ქორწილის მიმდინარეობისას სასტუმროში დამსვენებელმა უცხო ქვეყნის მოქალაქეებმა სასტუმროს ნომრის აივნიდან შეურაცხყოფა მიაყენეს ქორწილში მყოფ პირებს და წყალი დაასხეს აპარატურას, რის შემდეგაც ბრალდებულმა ფიზიკური დაზიანება მიაყენა უცხო ქვეყნის მოქალაქე ქალს. დაშავებული, შესაბამისი სამედიცინო დახმარების გაწევის მიზნით, კლინიკაში გადაიყვანეს.

ამასთან, ადმინისტრაციული წარმოება არის დაწყებული მომღერალ ალექსანდრე მრელაშვილთან მიმართებითაც.

შსს-ს ცნობით, მრელაშვილი პოლიციის განყოფილებაში ქორწილში მომხდარ ინციდენტთან დაკავშირებით მოწმის სახით იკითხებოდა, რა დროსაც მან უარი განაცხადა განყოფილებაში დიდი ხნით დარჩენაზე, ამის შემდეგ მან სიტყვიერი შეურაცხყოფა მიაყენა პოლიციის თანამშრომლებს და ნივთების შესანახი კარადა დააზიანა.