აშშ-ის ცენტრალურმა სარდლობამ ირანის წინააღმდეგ დარტყმების მორიგი ტალღა წარმატებით განახორციელა, - ინფორმაციას აშშ-ის ცენტრალური სარდლობა სოციალურ ქსელში ავრცელებს.

„CENTCOM-ის აქტივებმა ირანის სამხედრო ოპერაციების ცენტრებს, საზღვაო შესაძლებლობებს, თვითმფრინავების ანგარებს, დრონების საწყობებსა და სამხედრო ლოგისტიკურ ინფრასტრუქტურას დაარტყეს, რათა კიდევ უფრო შეემცირებინათ ირანის შესაძლებლობა, საფრთხე შეუქმნას კომერციულ გადაზიდვებს ჰორმუზის სრუტეში“, - განაცხადა ცენტრალურმა სარდლობამ X-ზე გამოქვეყნებულ პოსტში.

განცხადებაში ასევე აღნიშნულია, რომ ირანმა ბოლო სამი თვის განმავლობაში სრუტეში გამავალ 30-ზე მეტ კომერციულ გემს შეუტია, მაგრამ ირანის აგრესიის მიუხედავად, ჰორმუზის სრუტე კომერციული გემების ტრანზიტისთვის ღია რჩება.

„მაისის დასაწყისიდან CENTCOM-მა 900-მდე კომერციული გემისა და 450 მილიონი ბარელი ნედლი ნავთობის ტრანზიტს შეუწყო ხელი“, - აღნიშნულია ცენტრალური სარდლობის განცხადებაში.

ირანული მედიის ინფორმაციით, დღეს დილით ირანის დედაქალაქ თეირანში საჰაერო თავდაცვა ამოქმედდა. ამასთან, ირანის რევოლუციის გუშაგთა კორპუსის წარმომადგენლებმა განაცხადეს, რომ „აშშ-ის დასასჯელად“ გამთენიისას თავდასხმების ტალღა დაიწყეს.