უკრაინულმა F-16-მა რუსული ავიაგამანადგურებელი ჩამოაგდო, - ამის შესახებ აშშ-ის შეიარაღებული ძალების გაერთიანებული შტაბის თავმჯდომარემ, გენერალმა დენ კეინმა კონგრესში მოსმენისას განაცხადა.

„მსურს ხაზი გავუსვა იმ წარმოუდგენელ სამუშაოს, რომელსაც უკრაინის სამრეწველო ბაზა საკუთარი შესაძლებლობების გაფართოების თვალსაზრისით ასრულებს. ეს მოიცავს ყველაფერს, როგორც მიწა-ჰაერის კლასის, ისე ჰაერი-ჰაერის კლასის შესაძლებლობებს“, - განაცხადა დენ კეინმა.

მისი თქმით, პირველი შემთხვევაა, როდესაც უკრაინულმა F-16-მა რუსული ავიაგამანადგურებელი ჰაერში ბრძოლისას ჩამოაგდო.

„ცოტა ხნის წინ პირველი საჰაერო ბრძოლის მოწმეები გავხდით, რომელშიც უკრაინულმა F-16-მა რუსული ავიაგამანადგურებელი ჩამოაგდო. ბოლო წლების განმავლობაში უკრაინამ პარტნიორების მხარდაჭერით თავისი რამდენიმე დონისგან შემდგარი თავდაცვის სისტემა მნიშვნელოვნად გააძლიერა“, - აღნიშნა გენერალმა კეინმა.

სენატორების კითხვაზე, რუსეთსა და უკრაინის ომში ვისი გამარჯვება სურს, კეინმა უპასუხა, რომ უკრაინის.

„მსურს, რომ უკრაინამ გაიმარჯვოს“, - უპასუხა აშშ-ის შეიარაღებული ძალების გაერთიანებული შტაბების თავმჯდომარემ.

ასევე, კიდევ ერთ შეკითხვაზე, არის თუ არა რუსეთი აშშ-ის მეგობარი, კეინმა აღნიშნა, რომ „ისინი მეგობრები არ არიან“.

„ვფიქრობ, ეს რთული ურთიერთობაა. არ მიმაჩნია, რომ ისინი ჩვენი მეგობრები არიან“, - აღნიშნა დენ კეინმა.