უკრაინის შეიარაღებული ძალების გენერალური შტაბის ახალი უფროსი გენერალ-მაიორი იგორ სკიბიუკი გახდება, - ინფორმაციას უკრაინული მედია პრეზიდენტ ვოლოდიმირ ზელენსკიზე დაყრდნობით ავრცელებს.

„განვსაზღვრეთ მოქმედების კურსი. დღეს ოფიციალურად დამტკიცდება გადაწყვეტილებები უკრაინის შეიარაღებული ძალების ხელმძღვანელობის შეცვლის შესახებ; მზადდება შესაბამისი ბრძანებულებები. მიხაილო დრაპატისთან და ევგენ ხმარასთან ერთად განვსაზღვრეთ, რომ გენერალ-მაიორი იგორ სკიბიუკი, დიდი გამოცდილების მქონე სამხედრო პირი, რომელთანაც ახალი მთავარსარდალი მხარდამხარ იცავდა უკრაინას, გახდება უკრაინის შეიარაღებული ძალების გენერალური შტაბის ახალი უფროსი. მნიშვნელოვანია, რომ ჩვენი არმიის ყველა კომპონენტი განაგრძობდეს სრულყოფილ ჰარმონიაში ფუნქციონირებას. ასევე, ერთობლივად განვსაზღვრეთ, თუ როგორ გააგრძელებენ ალექსანდრე სირსკი და ანდრეი გნატოვი ჩვენი სახელმწიფოს დაცვას“, - აღნიშნა ზელენსკიმ.

ცნობისთვის, იგორ სკიბიუკი, რომელიც მანამდე საჰაერო-სადესანტო ჯარების მეთაური იყო, 2025 წლის ივნისში გენერალური შტაბის ხელმძღვანელის მოადგილედ დაინიშნა. გენერალური შტაბის ხელმძღვანელის პოსტზე სკიბიუკი ანდრეი გნატოვს ჩაანაცვლებს.