ქვეყნის ხუთი წამყვანი კომერციული ბანკი - ტერაბანკი, ლიბერთი, ბაზისბანკი, საქართველოს ბანკი და თიბისი - ერთობლივად დანერგავენ საერთაშორისო პლატფორმას Nasdaq Calypso, რომელიც საქართველოს საბანკო სექტორის სახაზინო ინფრასტრუქტურის ტრანსფორმაციას შეუწყობს ხელს.

პროექტი ხორციელდება „საქართველოს ფინანსური ბაზრების განვითარების პროგრამის“ (GMAP) ფარგლებში, საქართველოს ეროვნული ბანკის მხარდაჭერითა და საქართველოს ფინანსური ბაზრების ხაზინების ასოციაციის (GFMTA) ეგიდით.

Nasdaq Calypso-ს დანერგვა ბანკებს შესაძლებლობას მისცემს გამოიყენონ თანამედროვე, საერთაშორისო სტანდარტების შესაბამისი სახაზინო პლატფორმა, რაც ფინანსური ბაზრის შემდგომ განვითარებასა და ეფექტიანობის ზრდას უზრუნველყოფს.

„Nasdaq Calypso-ს პლატფორმის დანერგვა ტერაბანკისათვის მნიშვნელოვანი ნაბიჯია, რაც გააძლიერებს ჩვენი სახაზინო ოპერაციების ტექნოლოგიურ შესაძლებლობებს და შექმნის მყარ საფუძველს ახალი ფინანსური ინსტრუმენტების განვითარებისთვის. განსაკუთრებით მნიშვნელოვანია, რომ თანამედროვე ინფრასტრუქტურა საშუალებას მოგვცემს ეტაპობრივად შევთავაზოთ ჩვენს კლიენტებს დერივატივებზე დაფუძნებული პროდუქტები და რისკების მართვის მეტად დახვეწილი გადაწყვეტილებები, რაც დღეს განვითარებული ფინანსური ბაზრების აუცილებელი კომპონენტია. ამავდროულად, საერთო სტანდარტზე დაფუძნებული ინფრასტრუქტურა ხელს შეუწყობს საქართველოს კაპიტალის ბაზრის განვითარებას, ბაზრის ლიკვიდურობის ზრდასა და ფინანსური ბაზრის მონაწილეებს შორის უფრო ეფექტიან თანამშრომლობას.“ - განაცხადა სოფო ჯუღელმა, ტერაბანკის ფინანსურმა დირექტრომა.

(R)