მოსაწონი არ იყო ნოდარ დუმბაძის შეურაცხყოფა, გინება, დაცინვა, გამაიმუნება, გაბითურება, თუმცა არავისთვის არაფერი მომიწოდებია - პირში წყალი დამეგუბებინა და კომენტარი არ გამეკეთებინა იმის შიშით, რომ ქუჩაში არავინ დახვედროდა?! დაცვა ამეყვანა ამ ადამიანისთვის?! ენა უნდა აკონტროლოს ზრდასრულმა ადამიანმა, მით უმეტეს, როდესაც საჯაროდ ზიხარ და კომენტარებს აკეთებ, - ამის შესახებ „ქართული ოცნების“ დეპუტატმა, ირაკლი ჭეიშვილმა ჟურნალისტებთან განაცხადა, რითაც იუმორისტ ონისე ოქრიაშვილზე განხორციელებულ თავდასხმას გამოეხმაურა.

მისივე თქმით, ფიზიკური ძალადობა „მოსაწონი არ არის“.

„მე არ ვამართლებ იმას, რაც ქუჩაში მოხდა. მე არ ვფიქრობ, რომ ასე უნდა გაუსწორდნენ ადამიანებს. გაღიზიანებული მოქალაქე ქუჩაში დახვდა. არასწორად მოიქცა, სისხლის სამართლის დანაშაული ჩაიდინა, ადამიანს სასტიკად გაუსწორდა და შესაბამისად, პასუხისგებაში მიეცა. მე არავისთვის არაფერი მომიწოდებია. პირში წყალი დამეგუბებინა და კომენტარი არ გამეკეთებინა იმის შიშით, რომ ქუჩაში არავინ დახვედროდა?! პოლიტიკოსი ვარ და შეფასება გავაკეთე. დაცვა ამეყვანა ამ ადამიანისთვის?! ენა უნდა აკონტროლოს ზრდასრულმა ადამიანმა, მით უმეტეს, როდესაც საჯაროდ ზიხარ და კომენტარებს აკეთებ.

ეს [ძალადობა] არ არის მოსაწონი, გალახეთ-მეთქი არ მითქვამს. მოსაწონი არ იყო ნოდარ დუმბაძის შეურაცხყოფა, გინება, დაცინვა, გამაიმუნება, გაბითურება. არა ბუღაძეა მაგარი და ნოდარ დუმბაძეა არაფერი?!“ - განაცხადა ჭეიშვილმა.

ჟურნალისტის სიტყვებზე, „პარლამენტში ჩხუბია ყოველდღე...“ ირაკლი ჭეიშვილმა განაცხადა: „ყოველდღე ჩხუბი სად ნახეთ ამ მოწვევაში?! ერთხელ ვიჩხუბეთ და იმას გადაგვაყოლეთ მოკლედ“.

ცნობისთვის, იუმორისტ ონისე ოქრიაშვილს ფიზიკურად გაუსწორდნენ. მოგვიანებით ოქრიაშვილმა განაცხადა, რომ ფიზიკური ანგარიშსწორება მწერალ ნოდარ დუმბაძის გარშემო განვითარებულ მოვლენებს უკავშირდება. მომხდარ ფიზიკურ ძალადობასთან დაკავშირებით შინაგან საქმეთა სამინისტრომ ერთი პირი დააკავა.

შეგახსენებთ იმასაც, რომ რამდენიმე დღის წინ, ონისე ოქრიაშვილმა ერთ-ერთ პოდკასტში მწერალ ნოდარ დუმბაძის შესახებ ისაუბრა, რაც ცალკეული ჯგუფების მხრიდან შეურაცხყოფად შეფასდა. ამას ვიდეომიმართვით თავად ონისე ოქრიაშვილიც გამოეხმაურა და განაცხადა, რომ ვიდეო, რომლის საფუძველზეც მას „აშავებენ“, კონტექსტიდანაა ამოგლეჯილი და მწერალს კი არ მიაყენა შეურაცხყოფა, არამედ ჰიპოთეზურად განასახიერა აბსურდული ადამიანი, რომელსაც ნოდარ დუმბაძე ეზიზღება.