ევროკავშირის საბჭომ სომხეთთან ვაჭრობის ლიბერალიზაციის დროებითი ზომები დაამტკიცა, - ინფორმაციას ევროკავშირის საბჭოს პრესსამსახური ავრცელებს.

ევროკავშირის საბჭომ ევროკომისიის წინადადებას დაუჭირა მხარი, რომელიც რუსეთის მხრიდან სავაჭრო შეზღუდვების დაწესების ფონზე, სომხეთის ეკონომიკის მხარდაჭერას ითვალისწინებს.

ევროკავშირის საბჭოს მიერ მიღებული ზომები სომხეთიდან ევროკავშირში საქონლის ექსპორტის 80%-ის, ასევე, რუსეთში ექსპორტირებული ხილის, ბოსტნეულისა და მცენარეების 99%-ისა და სასმელების 91%-ზე მეტის ლიბერალიზაციას მოიცავს.

საბჭოს ცნობით, სომხეთთან ვაჭრობის ლიბერალიზაციის ზომები ორი წლის ვადით იმოქმედებს, საქონლის წარმოშობის ევროპული წესების დაცვის, ევროკავშირთან ადმინისტრაციული თანამშრომლობის, ევროკავშირიდან იმპორტზე შეზღუდვების დაწესებაზე უარის თქმის, ყოვლისმომცველი და გაფართოებული პარტნიორობის შეთანხმების (CEPA) პირობების, მათ შორის, დემოკრატიის პრინციპების, კანონის უზენაესობისა და ადამიანის უფლებების დაცვის პირობით.

სომხეთთან ვაჭრობის ლიბერალიზაციის შესახებ გადაწყვეტილება ახლა ევროპარლამენტმა უნდა დაამტკიცოს.