მოსკოვში გერმანიის საქმეთა დროებითი რწმუნებული, ბერნდ ფინკე რუსეთის საგარეო საქმეთა სამინისტროში დაიბარეს, - ინფორმაციას რუსული მედია ქვეყნის საგარეო საქმეთა სამინისტროზე დაყრდნობით ავრცელებს.

„2 სექტემბერს, რუსეთის საგარეო საქმეთა სამინისტრომ მოსკოვში გერმანიის საქმეთა დროებითი რწმუნებული, ბ. ფინკე, გერმანიის ხელისუფლების გუშინდელი ანტირუსული ქმედებებისა და განცხადებების ფონზე უწყებაში დაიბარა“, - ნათქვამია სამინისტროს განცხადებაში.

შეგახსენებთ, გუშინ გერმანიამ ლაიფციგის აეროპორტში დრონით თავდასხმაზე პასუხისმგებლობა რუსეთს ოფიციალურად დააკისრა. დღეს ევროპულმა სახელმწიფოებმა რუსი დიპლომატები საგარეო უწყებებში დაიბარეს. კერძოდ, რუსი დიპლომატები დაიბარეს: გერმანიამ, საფრანგეთმა, ნიდერლანდებმა. ამასთან, ევროკავშირის უმაღლესი წარმომადგენლის საგარეო საქმეთა და უსაფრთხოების პოლიტიკის საკითხებში, კაია კალასის ცნობით, დიპლომატიურმა სამსახურმა ბრიუსელში რუსეთის ელჩი უკვე დაიბარა, ხოლო რუსეთის წინააღმდეგ ახალი სანქციების საკითხს ევროკავშირის საგარეო საქმეთა მინისტრები ირლანდიაში მიმდინარე არაფორმალურ შეხვედრაზე განიხილავენ.