აშშ-ის სახელმწიფო მდივანმა, მარკო რუბიომ, განაცხადა, რომ ვაშინგტონი და კიევი მოლაპარაკებებს აწარმოებენ ლიცენზიაზე, რომელიც უკრაინას საშუალებას მისცემს, Patriot-ის საჰაერო თავდაცვის სისტემისთვის რაკეტები აწარმოოს.

ამასთან, რუბიომ ხაზი გაუსვა, რომ ლიცენზიის მიღების შემთხვევაშიც კი უკრაინის საჭიროება დაუყოვნებლივ ვერ მოგვარდება.

„ახლა ამაზე მოლაპარაკებები მიმდინარეობს, მაგრამ ეს არ არის მყისიერი გადაწყვეტა. წარმოების გაზრდა, თუნდაც ლიცენზია გქონდეთ, არის ის, რისთვისაც ამ ქარხნების აშენებას რამდენიმე წელი სჭირდება. ეს არის მაღალტექნოლოგიური იარაღი. ახლა ამაზე მოლაპარაკებები მიმდინარეობს. შესაძლოა, ეს განხორციელდეს, მაგრამ ნამდვილად არ გადაჭრის იმ მოკლევადიან გამოწვევას, რომელზეც ისინი მიუთითებენ“, - აღნიშნა რუბიომ Fox News-თან ინტერვიუში.

ამასთან, მისი თქმით, „მთელი მსოფლიო მეტ საჰაერო ჩამჭრელ აპარატს ითხოვს“, თუმცა აშშ-ს საჭიროებები პირველ ადგილზეა.

„ეს პლანეტაზე ნომერ პირველი თავდაცვის საჭიროება გახდა, არა მხოლოდ უკრაინისთვის, არამედ მთელი პლანეტისთვის“, - აღნიშნა რუბიომ.