კორუფციულ დანაშაულში ბრალდებულ, სუს-ის ყოფილი უფროსის, გრიგოლ ლილუაშვილის საქმეზე, ლევან ჯანგველაძის შეკვეთითა და ანგარებით მკვლელობის ორგანიზებაში მსჯავრდებულმა გიორგი მიქაძემ მისცა ჩვენება. გიორგი მიქაძეს ბრალი „ქოლ ცენტრების“ საქმეშიც აქვს წაყენებული. სწორედ, აღნიშნულის ფარგლებში მისცა მან სასამართლოში ჩვენება, როგორც ლილუაშვილის დაცვის მხარის მოწმემ.

ცნობისთვის, სახელმწიფო უსაფრთხოების სამსახურის ყოფილი უფროსი გრიგოლ ლილუაშვილი 23 დეკემბერს დააკავეს. მას ბრალი ედება საქართველოს სისხლის სამართლის კოდექსის 338-ე მუხლის მე-2 ნაწილის ,,გ’’ ქვეპუნქტით და მე-3 ნაწილის ,,ე’’ ქვეპუნქტით, რაც წინასწარი შეთანხმებით ჯგუფის მიერ, განსაკუთრებით დიდი ოდენობით ქრთამის აღებას გულისხმობს და სასჯელის სახით 11-დან 15 წლამდე თავისუფლების აღკვეთას ითვალისწინებს.

„ქოლ ცენტრების“ საქმეზე კი 10 პირია ბრალდებული. მათ შორის არიან, ძმები მიქაძეები, ყოფილი გენერალური პროკურორი ოთარ რომანოვ-ფარცხალაძე და ჟურნალისტი ელისო კილაძე.

ელისო კილაძეს, ოთარ რომანოვ-ფარცხალაძეს, გიორგი მიქაძეს, დავით მიქაძეს, ირაკლი სეხნიაშვილს, მიხეილ ჩოხელს, გივი ჯიბლაძეს, ბენ ანორს, თორნიკე ჯანელიძესა და გიორგი კამლაძეს ბრალი სისხლის სამართლის კოდექსის 180-ე და 194-ე მუხლებით აქვთ წარდგენილი, რაც ორგანიზებული ჯგუფის მიერ თაღლითობასა და უკანონო შემოსავლის ლეგალიზაციას (ფულის გათეთრებას) გულისხმობს. აღნიშნული ქმედება სასჯელის სახედ და ზომად 9-დან 12 წლამდე თავისუფლების აღკვეთას ითვალისწინებს.

აღნიშნული პირების საქმისგან ცალკე წარმოებად მიმდინარეობს ელისო კილაძის საქმის წარმოება.