სარატოვის ოლქში რუს სამხედრო მოსამსახურეზე თავდასხმა განხორციელდა, - ინფორმაციას რუსეთის სახელმწიფო საინფორმაციო სააგენტო TASS-ი ავრცელებს.

რუსეთის საგამოძიებო კომიტეტმა მომხდართან დაკავშირებით სისხლის სამართლის საქმე აღძრა, თუმცა სამხედრო მოსამსახურის ვინაობა არ დაასახელა.

დაშავებული რუსი სამხედრო მოსამსახურე საავადმყოფოში გადაიყვანეს.

რუსული „ტელეგრამ“ არხების ცნობით, თავდასხმის სამიზნე გენერალ-მაიორი ნიკოლაი ვარპახოვიჩი იყო, რომელიც რუსეთის კოსმოსური-საჰაერო ძალების 22-ე მძიმე ბომბდამშენი ავიადივიზიის მეთაურია.

მათივე ინფორმაციით, ვარპახოვიჩს თავდასმხმელმა სახლთან რამდენჯერმე ესროლა, რის შედეგადაც, დაიჭრა და მისი მდგომარეობა მძიმეა.

უკრაინული მედია წერს, რომ 31 აგვისტოს უკრაინის უსაფრთხოების სამსახურმა და ქვეყნის გენერალურმა პროკურატურამ ნიკოლაი ვარპახოვიჩს ბრალი დაუსწრებლად წაუყენეს. გამოძიების განცხადებით, 2024 წლის 8 ივლისს კიევში „ოხმატდიტის“ ბავშვთა საავადმყოფოზე დარტყმის ბრძანება სწორედ ვარპახოვიჩმა გასცა.