რუსთავის მე-12 პენიტენციურ დაწესებულებაში პატიმრობაში მყოფი ყოფილი პრემიერ-მინისტრის, ირაკლი ღარიბაშვილის გამოკითხვა მიმდინარეობს. პროკურატურისა და შინაგან საქმეთა სამინისტროს წარმომადგენლები საპატიმრო დაწესებულებაში ცოტა ხნის წინ შევიდნენ. ყოფილი პრემიერ-მინისტრი საგამოძიებო უწყების წარმომადგენლებს მის მიერ, ბოლოს გავრცელებული წერილის საფუძველზე პასუხობს, სადაც მათ შორის ლაზარე ჯორბენაძის გარდაცვალების შესახებ სვამდა კითხვას.

საგამოძიებო უწყების წარმომადგენლებს ციხეში შესვლამდე მედიასთან კომენტარი არ გაუკეთებიათ.

ცნობისთვის, საქართველოს ყოფილმა პრემიერ-მინისტრმა, ირაკლი ღარიბაშვილმა საპატიმროდან მორიგი წერილი გამოაქვეყნა, რომელშიც სვამს კითხვას, „რა გახდა უფლებადამცველი ლაზარე ჯორბენაძის გარდაცვალების რეალური მიზეზი?“ და ამბობს, რომ საზოგადოებაში „დღემდე რჩება პასუხგაუცემელი კითხვები არაერთი ადამიანის თვითმკვლელობის ფაქტთან დაკავშირებით, რომლებსაც ადგილი ჰქონდა კობახიძე-მდინარაძის მმართველობის დროს“.

დღეს კი პროკურატურამ გაავრცელა განცხადება, რომელშიც დაადასტურა, ლაზარე ჯორბენაძის თვითმკვლელობის ფაქტი. მათივე ინფორმაციით, მიუხედავად ამისა, მსჯავრდებულ ირაკლი ღარიბაშვილისა და სხვა პირების მიერ აღნიშნულ საკითხზე საჯაროდ გაკეთებული განცხადებების საფუძველზე, პროკურატურის ზედამხედველობით, შინაგან საქმეთა სამინისტროში მიმდინარე გამოძიების ფარგლებში, გამოიკითხებიან ნიკა გვარამია; ირმა ინაშვილი; ნანუკა ჟორჟოლიანი; ხატია დეკანოიძე; თაზო დათუნაშვილი; გია ხუხაშვილი; გიორგი ლილუაშვილი; ზაზა დავითაია; ერმილე ნემსაძე; გიორგი გიგაური.