გერმანიამ უკრაინის ენერგეტიკის მხარდამჭერ ფონდს დამატებითი 250 მილიონი ევრო გადასცა. ამის შესახებ ინფორმაციას უკრაინის პირველი ვიცე-პრემიერი ენერგეტიკის საკითხებში, დენის შმიგალი ავრცელებს.

“მადლობას ვუხდი გერმანიის მთავრობას და პირადად ეკონომიკისა და ენერგეტიკის მინისტრს, კატერინა რაიხეს. ამ მხარდაჭერას უკიდურესად დიდი მნიშვნელობა აქვს ზამთრამდე უკრაინის ენერგეტიკის სიმყარის გაძლიერებისთვის”, - წერს შმიგალი.

ის, ასევე, აღნიშნავს, რომ გერმანია უკრაინის ენერგეტიკის მხარდამჭერი ფონდის უდიდესი დონორია და დღეს, 3 სექტემბერს, გამოცხადებული შენატანით, გერმანიის საერთო წვლილი 807 მილიონი ევროა. მთლიანობაში, დონორებმა ფონდში 2.4 მილიარდ ევროზე მეტი შეიტანეს.

თუმცა, შმიგალის თქმით, მუდმივი რუსული თავდასხმების პირობებში უკრაინული ენერგეტიკული კომპანიების საჭიროებები ჯერ კიდევ მნიშვნელოვანია.