რუსეთის პრეზიდენტმა ვლადიმერ პუტინმა სომხეთის პრემიერ-მინისტრი ნიკოლ ფაშინიანი ბიშკეკში გამართული შეხვედრის დროს მოსკოვში მოიწვია, სომხეთის პრემიერ-მინისტრმა მიწვევა მიიღო, - ამის შესახებ რუსეთის პრეზიდენტის პრესსპიკერმა, დიმიტრი პესკოვმა, განაცხადა.

„ყველაფრის კომპლექსურად განხილვის მიზნით, სწორედ პუტინმა მოიწვია ფაშინიანი მოსკოვში. ფაშინიანმა მიიღო მიწვევა და განაცხადა, რომ მალე ჩამოვა“, - აღნიშნა პესკოვმა.

მისი თქმით, ფაშინიანის, მოსკოვში ვიზიტი მალე შედგება, ზუსტი თარიღები დიპლომატიური არხებით შეთანხმდება.

ამასთან, პესკოვის ინფორმაციით, ვლადიმერ პუტინსა და ნიკოლ ფაშინიანს მოსკოვში გამართულ შეხვედრაზე სომხეთში რეფერენდუმის ჩატარების საკითხის განხილვის შესაძლებლობა ექნებათ.

„სახელმწიფოთა მეთაურებს კიდევ ერთხელ ექნებათ შესაძლებლობა, ჩვენი ორმხრივი ურთიერთობების ამჟამინდელი მთავარი საკითხი ყველა მხრიდან განიხილონ. ეს საკითხი, საბოლოო ჯამში, სომხეთის განვითარების მიმართულებისა და ორიენტაციის არჩევანს, ასევე შესაბამისი რეფერენდუმის ჩატარებას ეხება“, - აღნიშნა პესკოვმა.