აშშ-ს, უკრაინასა და რუსეთს შორის კიდევ ერთი სამმხრივი მოლაპარაკებების შესაძლებლობა არსებობს, - ამის შესახებ უკრაინის პრეზიდენტმა, ვოლოდიმირ ზელენსკიმ გამოცემა Axios-თან ინტერვიუში განაცხადა.

„ჩვენ ეს სექტემბერი და ოქტომბერი გვაქვს, რათა მოლაპარაკებებისთვის გზა ვიპოვოთ. დიალოგის გარეშე შედეგი ვერ გვექნება. ვფიქრობ, პრეზიდენტ ტრამპს შეუძლია ცივ ზამთრამდე მოლაპარაკებების დასაწყებად გზა იპოვოს“, - განაცხადა ზელენსკიმ.

მისი თქმით, უკრაინამ ნებისმიერი დიპლომატიური პროცესის მიმდინარეობისას სამხედრო ძლიერება უნდა შეინარჩუნოს.

ასევე, ზელენსკიმ აღნიშნა, რომ ახლა უკრაინა ბრძოლის ველზე იმაზე უკეთეს მდგომარეობაშია, ვიდრე ადრე.

ზელენსკის განცხადებით, პუტინი იმედს ამყარებს იმაზე, რომ ზამთარში უკრაინას საკმარის ზიანს მიაყენებს, რათა კიევს დათმობებზე წასვლა აიძულოს.

„რუსეთი ნამდვილად ფიქრობს, რომ ეს ზამთარი დაეხმარება, რათა ჩვენი გატეხვა შეძლოს“, - აღნიშნა უკრაინის პრეზიდენტმა.