ერთადერთი საინტერესო პაატა ბურჭულაძის განცხადებაში არის სწორედ ეს პასაჟი - მკვდარ თევზებს ნამდვილად წააგავს ოპოზიცია მთელი თავისი შინაარსით, მთელი თავისი დღევანდელი გამოხატულებით, - ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა, რითაც 4 ოქტომბრის საქმეზე მსჯავრდებული, პაატა ბურჭულაძის წერილი შეაფასა.

მისი თქმით, ოპოზიციას არც ქუჩის და არც არჩევნების რესურსი არ გააჩნია.

„ერთადერთი საინტერესო პაატა ბურჭულაძის განცხადებაში არის სწორედ ეს პასაჟი - მკვდარ თევზებს ნამდვილად წააგავს ოპოზიცია მთელი თავისი შინაარსით, მთელი თავისი დღევანდელი გამოხატულებით. არანაირი რესურსი მათ არ აქვთ არც ქუჩის, არც არჩევნების. ხან არჩევნებზე საუბრობენ, ხან ქუჩაზე, სინამდვილეში იქაც და იქაც არიან წარუმატებლები. რა თქმა უნდა, ასე გაგრძელდება ერთი მარტივი მიზეზის გამო, მათ არ აქვთ პრინციპები, მათ არ უყვართ ქვეყანა და სწორედ ამის შედეგია ის, რომ ისინი ვერ აღწევენ და ვერც მიაღწევენ ვერავითარ წარმატებას“, - განაცხადა ირაკლი კობახიძემ.

ცნობისთვის, მომღერალმა, 4 ოქტომბრის საქმეზე მსჯავრდებულმა, პაატა ბურჭულაძემ ციხიდან წერილი გამოგზავნა, სადაც აღნიშნულია, რომ მათ 4 ოქტომბერს "ოცნების" „გადარჩევნები“ ჩაატარეს, არჩევნების ჩატარება კი პოლიტიკოსებმა უნდა უზრუნველყონ.

ბურჭულაძე თავის წერილში რიგ ოპოზიციონერ პოლიტიკოსებს ახსენებს, რომ „დინებას მხოლოდ მკვდარი თევზები მიჰყვებიან“.

„ვიღებ წერილებს, მადლობელი ვარ იმ პოლიტიკოსების, რომლებიც მწერენ, რომ მათ შეიცვალეს აზრი და ახლა ხედავენ, დადებითად აფასებენ კრების გადაწყვეტილებას და დარწმუნებული არიან, რომ რაც დრო გავა, ის უფრო დაფასდება და ის უკვე შევიდა საქართველოს ისტორიაში. იმ ოპო-პოლიტიკოსებს კი, რომლებიც დღესაც აკრიტიკებენ 4 ოქტომბერს, ვუსურვებ რომ დაუსრულებელი ლაპარაკის და აზრების გამოთქმის გარდა უკეთესი სამოქმედო გეგმა შემოგვთავაზონ და ჩვენ, საქართველოს მოქალაქეები მათ გავყვებით. მაგრამ ერთი რამ არ დაივიწყონ, რომ დინებას მხოლოდ მკვდარი თევზები მიჰყვებიან“, - წერს ბურჭულაძე.