გარემოს დაცვის მინისტრმა ქუთაისში გამწვანების აქციაში მიიღო მონაწილეობა
გარემოს დაცვის მინისტრმა ქუთაისში მოსწავლეებთან ერთად ნერგები დარგო.
როგორც `ინტერპრესნიუსს~ გარემოს დაცისა და ბუნებრივი რესურსების სამინისტროდან აცნობეს, მინისტრი გოგა ხაჩიძე დღეს იმერეთის რეგიონს სტუმრობდა. ქუთაისში მე-15 საჯარო სკოლის მოსწავლეებთან ერთად მინისტრმა გამწვანების აქციაში მიიღო მონაწილეობა.
„შევახსენებ ყველას, შევასრულოთ პატრიარქის კურთხევა: თითოეულმა ჩვენთაგანმა წელიწადში 12 ნერგი უნდა დარგოს. დარგვის სეზონი მთავრდება და ყველას ვთხოვ ვიჩქაროთ და შევასრულოთ უწმინდესის კურთხევა“, - განაცხადა გოგა ხაჩიძემ.
მინისტრმა პედაგოგებთან და მოსწავლეებთან ერთად სკოლის მიმდებარე ტერიტორიაზე იფანის, ნეკერჩხლის, შავი ფიჭვისა და ველური ნუშის ნერგები დარგო. სამინისტროს ინიციატივით აქცია - „დარგე ხე - გაამწვანე შენი გარემო“ საქართველოს თითქმის ყველა ქალაქს მოიცავს.
გასული წლის შემოდგომასა და გაზაფხულზე სამინისტრომ უკვე განახორციელა გამწვანების აქცია, რომლის ფარგლებშიც დედაქალაქსა და საქართველოს რეგიონებში 300 ათასზე მეტი ნერგი დაირგო.
v-if="article.gallery" v-html="article.gallery"
