"ბათუმელები" და "ნეტგაზეთი.გე" "მედიაპალიტრას" სოლიდარობას უცხადებენ

გაზეთი "ბათუმელები" და "ნეტგაზეთი.გე" "მედიაპალიტრას" სოლიდარობას უცხადებენ.გამოცემებს მიაჩნიათ, რომ "მედიაპალიტრაში" დაწყებული ფინანსური შემოწმება არ უნდა გახდეს დამოუკიდებელ მედიასაშუალებაზე რაიმე სახის ზეწოლის საფუძველი.

"იმედია, ფინანსური შემოწმება არ გახდება ამ ჰოლდინგში გაერთიანებული მედიასაშუალებების მუშაობის შეფერხების მიზეზი და შემოსავლების სამსახური სამართლიანად და ოპერატიულად ჩაატარებს ამ შემოწმებას", - აცხადებენ "ბათუმელები" და "ნეტგაზეტი.გე".

შემოსავლების სამსახურის აუდიტის დეპარტამენტმა "მედიაპალიტრის" ექვს სხვადასხვა სტრუქტურაში არაგეგმური შემოწმება გუშინ ერთდროულად დაიწყო, დაილუქა რამდენიმე ობიექტი, ზოგიერთ მათგანზე ამ დროისთვის ლუქი დროებით მოხსნილია.