ბადრი პატარკაციშვილის ოჯახმა ხელისუფლებასთან დავა მორიგებით დაასრულა
ბადრი პატარკაციშვილის ოჯახი საგანგებო განცხადებას ავრცელებს, რასაც "ინტერპრესნიუსი" უცვლელად გთავაზობთ.
"ბადრი პატაკაციშვილის ოჯახმა გადაწყვიტა, მორიგებით დაასრულოს დავა, რომელიც 3 წლის განმავლობაში გრძელდებოდა საქართველოს ხელისუფლებასთან, საერთაშორისო არბიტრაჟში და ეხებოდა ოჯახისათვის მთაწმინდის პარკისა და სამაუწყებლო კომპანია "იმედი"-ს დაკარგვასთან დაკავშირებული ზარალის ანაზღაურებას. მოდავე მხარეები შეთანხმდნენ, რომ გარკვეული ტექნიკური დეტალების შესრულებისთანავე, საბოლოოდ შეწყვიტონ არბიტრირება და ამით წერტილი დაუსვან თავიანთ დავას.
მიღწეული შეთანხმება ემყარება ორმხრივ ურთიერთკომპრომისს. ოჯახი დათანხმდა, გამოიწვიოს უკან ყველა საჩივარი და მოხსნას პრეტენზიები საქართველოს ხელისუფლებისა და მესამე მხარეების წინააღმდეგ სამაუწყებლო კომპანია იმედთან და მთაწმინდის პარკთან დაკავშირებით (იტოვებს რა უფლებას გააგრძელოს დავა ჯოზეფ ქეის წინააღმდეგ საქართველოს ფარგლებს გარეთ სხვა აქტივებთან დაკავშირებით); და სანაცვლოდ, სამწლიანი შესვენების შემდეგ, გააგრძელოს ბადრი პატარკაციშვილის მიერ დაწყებული ეკონომიკური და საქველმოქმედო საქმიანობა.
ჩვენ გვჯერა, რომ ეს შეთანხმება სასარგებლო იქნება როგორც ჩვენი ოჯახის, ასევე საქართველოსთვის. ჯერ ერთი, მომავალში, საქართველოს ბუჯეტს არ დააწვება საგრძნობი ფინანსური ტვირთი, რაც მოხდებოდა თუ ჩვენ ავირჩევდით დავის საერთაშორისო არბიტრაჟში გაგრძელების გზას. და რაც მთავარია, ეს მოგვცემს საშუალებას ძალისხმევა მივმართოთ ინვესტიციებზე საქართველოს მომავალში, სამუშაო ადგილების შექმნაზე და საქველმოქმედო საქმიანობაზე. ამით ჩვენ გავაგრძელებთ და ხორცს შევასხამთ იმ საქმეს რაც ბადრიმ დაგვიტოვა", - აღნიშნულია ბადრი პატარკაციშვილის ოჯახის მიერ გავრცელებულ განცხადებაში.
v-if="article.gallery" v-html="article.gallery"
