ბათუმში ყინულის სასახლე გაიხსნება

ბათუმში 23 აგვისტოს ყინულის სასახლე გაიხსნება. ყინულის სასახლე ახალ ბულვარში განთავსდა და 1200 მაყურებელზეა გათვლილი.

სასახლის ხელმძღვანელობის ინფორმაციით, სექტემბრიდან აქ ეტაპობრივად ორი ათასზე მეტ მოზარდს მოამზადებენ; 8-დან 11-წლამდე ბავშვების სწავლება კი, უფასო იქნება.

ყინულის სასახლის გახსნის პრეზენტაციაზე ერთსაათიან პროგრამაა დაგეგმილი, რომელშიც მონაწილეობას მიიღებენ თბილისელი, ბათუმელი და ზუგდიდელი მოზარდები. ბათუმში ჩასვლას გეგმავს ელენე გედევანიშვილიც.

საქართველოს ფიგურული სრიალის ფედერაციის პრეზიდენტის, მაკა გიორგობიანის თქმით, ბათუმის სასახლე საქართველოში ერთადერთია, რომელიც ოლიმპიურ სტანდარტებს აკმაყოფილებს და, სადაც საერთაშორისო ტურნირების გამართვა იქნება შესაძლებელი.