ქართველმა მოკრივეებმა მსოფლიოს ჩემპიონატი ვადაზე ადრე დაასრულეს

აზერბაიჯანის დედაქალაქ ბაქოში მიმდინარე მსოფლიოს ჩემპიონატი კრივში, საქართველოს ნაკრებისთვის წარუმატებელი გამოდგა.

10 მოკრივით წარმოდგენილმა საქართველოს ეროვნულმა გუნდმა ჩემპიონატი ვადაზე ადრე დაასრულა და ვერც ლონდონის 2012 წლის ოლიმპიური თამაშების ლიცენზიების მოპოვება შეძლო.

ნაკრების 8 წევრმა პირველი წრე წარმატებულად დაასრულა, თუმცა მეორე წრის გადალახვა ვერ შეძლო.

3 ოქტომბერს მსოფლიოს პირველობას ნაკრების ბოლო სამი წევრი გამოეთიშა. მეორე რაუნდში ავთანდილ ჭუბაბრია (49 კგ.) იტალიელ ალექს ფერამოსკასთან 8:15 დამარცხდა, ჯაბა ხოსიტაშვილმა (75 კგ.) გერმანელ შტეფან ჰარტელთან 6:22 წააგო, ხოლო დავით გოგიშვილი (91 კგ.) ეკვადორელ ხულიო კასტილიოსთან 5:12 დამარცხდა.

ქართველ მოკრივეებს ლონდონის ოლიმპიადაზე მოსახვედრად ბოლო შანსი 2012 წელს დაგეგმილ სალიცენზიო ტურნირზე ექნებათ.