ზურაბ ბაზლიძე - "გლობალ TV"-ის დაახლოებით 50 000-მდე სატელიტური ანტენაა დაყადაღებული
ამ დროისთვის "გლობალ TV"-ის დაახლოებით 50 000-მდე სატელიტური ანტენაა დაყადაღებული, – ამის შესახებ "ინტერპრესნიუსს" "გლობალ TV"-ის ხელმძღვანელმა ზურაბ ბაზლიძემ განუცხადა.
მისი განმარტებით, დაყადაღებული არ ნიშნავს იმას, რომ ეს ქონება მათ ჩამორთმეული აქვთ ან დაკარგეს, თუმცა, კომპანია მორალურ ზარალს განიცდის, "რადგან ჩვენი მომხმარებელი დაშინებულია".
"რაც შეეხება ეკონომიკურ ზარალს, შემცირდა სატელიტური ანტენების მონტაჟის რაოდენობა და აქედან გამომდინარე, შემცირდა შემოსავლებიც. თუ ეს პროექტი შეჩერდა, დაახლოებით 500 დასაქმებული ადამიანი დაკარგავს სამუშაოს. ეს თავისთავად საკმაოდ დიდი ზარალია", - დასძინა ბაზლიძემ.
მისივე განცხადებით, "გლობალ TV"-ს ცენტრალურ ოფისში ხელმოუწერელი განჩინება მიიტანეს. ზურაბ ბაზლიძის თქმით, ეს დოკუმენტი არის მხოლოდ და მხოლოდ ფარატინა ქაღალდი, რომელზეც დატანილი არ არის არც მოსამართლის ხელმოწერა და არც შესაბამისი ბეჭედი. ამის გათვალისწინებით, იგი აცხადებს, რომ კომპანიის ობიექტების დაყადაღების პროცესი სრულიად უკანონოდ მიმდინარეობს.
v-if="article.gallery" v-html="article.gallery"
