2008 წლის რუსული აგრესიის დროს დაღუპული ქართველი ჯარისკაცი ზურაბ ტურაშვილი, რომლის იდენტიფიცირებაც დნმ-ის საშუალებით მოხერხდა, ყვარელში დაკრძალეს. ამის შესახებ ინფორმაციას საქართველოს თავდაცვის სამინისტრო ავრცელებს.

სამინისტროს ცნობით, დაღუპული ჯარისკაცის ოჯახს საქართველოს პრეზიდენტმა პირადად მიუსამძიმრა. დაკრძალვის ცერემონიალს მიხეილ სააკაშვილი და თავდაცვის მინისტრი დიმიტრი შაშკინი დაესწრნენ.

სერჟანტი ზურაბ ტურაშვილი ამ დრომდე უგზო-უკვლოდ დაკარგულად ითვლებოდა და მისი იდენტიფიცირება მხოლოდ დნმ-ის ანალიზის საფუძველზე მოხდა.

დნმ-ის ანალიზის შედეგების შესაბამისად, ასევე, მოხდა უფროსი სერჟანტის, გელა თიგიშვილის იდენტიფიცირებაც.

ზურაბ ტურაშვილი და გელა თიგიშვილი IV ქვეით ბრიგადაში მსახურობდნენ. სერჟანტი ტურაშვილი საქართველოს შეიარაღებულ ძალებში 2007 წლიდან ირიცხებოდა, უფროსი სერჟანტი თიგიშვილი - 2006 წლიდან. მათ მიღებული აქვთ ვახტანგ გორგასლის I ხარისხის ორდენი, მედალი "სამშობლოსათვის თავდადებული".

დაღუპული სამხედრო მოსამსახურეების დაკრძალვასთან დაკავშირებულ ყველა საჭირო ხარჯს საქართველოს თავდაცვის სამინისტრო დაფარავს.