თავდაცვისა და შინაგან საქმეთა ყოფილი მინისტრის,  ბაჩო ახალაიას, გაერთიანებული შტაბის ყოფილი უფროსის გიგი კალანდაძის და მათთან ერთად ბრალდებულების წინასასამართლო სხდომა  თბილისის საქალაქო სასამართლოში დღეს განახლდება.

წინასასამართლო სხდომაზე მოსამართლე ეკა არეშიძემ დაცვის მხარის იმ შუამდგომლობების შესახებ გადაწყვეტილებები უნდა გამოაცხადოს, რომელიც ბრალდებულების ადვოკატებმა წინა სხდომაზე დააყენეს.

კერძოდ, ადვოკატებმა წინა სხდომაზე მათი დაცვის ქვეშ მყოფების მიმართ სისხლის სამართლებრივი დევნის შეწყვეტა მოითხოვეს.

ამასთან, წინა სხდომაზე ბაჩო ახალაიას ადვოკატმა მისი დაცვის ქვეშ მყოფის გირაოთი გათავისუფლება მოითხოვა. კერძოდ, მალხაზ ველიჯანაშვილი ახალაიას მიმართ აღმკვეთი ღონისძიების - პატიმრობის 50 ათასლარიანი გირაოთი შეცვლას ითხოვდა, თუმცა მოსამართლემ შუამდგომლობა არ დააკმაყოფილა.

ბაჩო ახალაიას, გიგი კალანდაძეს და მათთან ერთად ბრალდებულ 5 პირს - მათ შორის გაგა მკურნალიძესა და ზურაბ შამათავას ბრალად სამსახურებრივი უფლებამოსილების გადამეტება, წამების ორგანიზება და თავისუფლების უკანონო აღკვეთა ედებათ ბრალად. საუბარია ე.წ. სენაკის ეპიზოდზე და ზვიად აბესაძისთვის თავისუფლების უკანონო აღკვეთის ბრალდებაზე.